पर्वत । सदरमुकाम कुश्मा बजारमा सञ्चालीत दुई वटा बहुमुखी क्याम्पसहरु एकिकरण (मर्ज) भएका छन् । कुश्मामा सञ्चालीत गुप्तेश्वर बहुमुखी क्याम्पस र शिवालय बहुमुखी क्याम्पसलाई मर्ज गरिएको हो । दुई क्याम्पस मर्ज पछि कुश्मा बहुमुखी क्याम्पस बनेको छ । विद्यार्थी संख्या घट्दै गएपछि दुई क्याम्पसलाई एकिकरण सम्बन्धि विभिन्न समस्याहरु समाधानका लागि समितिहरुको गठन गरिएको थियो ।
क्याम्पसलाई मर्ज गर्नका लागि शिवालय बहुमुखी क्याम्पसका पूर्व ब्यवस्थापन समिति अध्यक्ष गोविन्द पहाडीलाई संयोजक तोकिएको थियो । संयोजक पहाडीले दुई क्याम्पस मर्ज भएर नयाँ क्याम्पसको नामाकरण समेत भएको जानकारी दिए । दुई क्याम्पसको मर्ज पछि कुश्मा बहुमुखी क्याम्पस नामाकरण गरिएको छ । नयाँ नामाकरण भएको क्याम्पसलाई त्रिभुवन विश्वविद्यालयले समेत अनुमती दिएको छ । यस अघि दुई क्याम्पसका सञ्चालक समितिका पदाधिकारी, प्राध्यापकहरु तथा सञ्चालक सदस्यहरुको उपस्थितीमा ८ वटा उपसमितिहरुको गठन गरिएको थियो । समितिहरुले दुई क्पाम्पस मर्जका लागि कानूनी प्रावधानहरुको संसोधन देखि क्याम्पस सञ्चालनको आगामी खाका समेत प्रस्तुत गरेका थिए ।
क्याम्पसहरु एकिकरणका लागि भोलानाथ शर्माको संयोजकत्वमा विधान मस्यौदा उप समिति, कमलनाथ शर्माको संयोजकत्वमा इतिहास लेखन उप समिति, इन्द्रमान खत्रीको संयोजकत्वमा चन्दादाता संकलन उप समितिको गठन गरिएको थियो । यसैगरी पृथ्वीनारायण शर्माको संयोजकत्वमा जनशक्ति आवश्यकता लेखाजोखा तथा नियुक्ती सिफारिस उप समिति तथा मिन प्रसाद श्रेष्ठको संयोजकत्वमा जिन्सी सम्पत्ति अभिलेख संकलन उप समितिको गठन गरिएको थियो ।
यसैगरी एकिकरणको कामलाई प्रभावकारी बनाउनका लागि बिषम कुमार श्रेष्ठको संयोजकत्वमा आर्थिक अभियान सञ्चालन उप समिति, विष्णु नेवारको संयोजकत्वमा समुदाय सम्बन्ध परिचालन उप समिति र कमलनाथ पोख्रेलको संयोजकत्वमा आन्तरीक लेखा परिक्षण उप समितिको गठन गरिएको थियो । नयाँ नामकरण भएको क्याम्पसको तदर्थ ब्यवस्थापन समिति गठनको प्रक्रिया शुरु भएको छ ।
अहिले गुप्तेश्वर बहुमुखि क्याम्पसमा स्नातकोत्तर सहित २ सय ६२ र शिवालय बहुमुुखि क्याम्पसमा २६८ जना विद्यार्थी रहेका छन् । गुप्तेश्वर बहुमुखी क्याम्पस २०४८ सालदेखि सञ्चालनमा छ भने शिवालय बहुमुखी क्याम्पस २०६७ सालमा स्थापना भई सञ्चालनमा रहेको छ ।
https://youtu.be/GIWL8V2f_io?si=0lLtP-gaUZ_eMvEH
पर्वत जिल्लाभर १२ वटा क्याम्पस संचालनमा रहेका छन् । जिल्ला सवैजसो क्याम्पसहरुमा विद्यार्थीको संख्या न्यून छ । बिद्यार्थीको संख्या न्यून हुँदा ति क्याम्पसहरु बन्द हुने अवस्थामा पुगेका छन् ।
