काठमाडौं। नेकपा (एमाले) का नेता एवं प्रतिनिधि सभा सदस्य सूर्यबहादुर थापा क्षेत्रीले कांग्रेस–एमालेसहितको गठबन्धन सरकार कसैले ढाल्न नसक्ने बताएका छन् । आज (मंगलबार) रिपोर्टर्स क्लब नेपालद्वारा आयोजित साक्षत्कार कार्यक्रमलाई सम्बोधन गर्दैै उनले कसैले धुपबत्ति गरेर सरकार नढल्ने बताएका हुन् ।

उनले अहिले केही मान्छेहरुले भारतीय गुप्तचार संस्था ‘रअ’ का फेक पात्र सिर्जना गरेर सरकार ढल्न लागेको प्रचार गरिरहेको बताए । ती मान्छेहरुले नेपालको सरकार ६/६ महिनामा ढलोस् भन्ने चाहेको उनको भनाइ छ । त्यस्ता मान्छेहरुको प्रयासले वर्तमान सरकार नढल्ने उनको दाबी छ । उनले भने,‘ तिनले कुनै धुपबत्ति नगरे हुन्छ ।’

साथै, प्रधानमन्त्री ओलीको भारत भ्रमणको तयारी भइरहेको पनि उनले बताए । उनले यही पुसको अन्तिम साता प्रधानमन्त्री ओली भारत भ्रमणमा जाने बताए । ‘प्रधानमन्त्रीको भारत भ्रमण भएन, चीन भ्रमण भयो । अब सरकार ढल्ने भयो भनेर गोखरधन्दा गर्नेहरुको एउटा पंत्ति काठमाडौंमा जिविका गरिरहेको थियो । तिनीहरुले कान खोलेर सुने हुन्छ, थाहा पाए हुन्छ, प्रधानमन्त्रीको भारत भ्रमणको तयारी अगाडि बढेको छ । पुसको अन्तिम हप्ता उहाँ भारत भ्रमणमा जाने प्रक्रिया अगाडि बढेको छ,’– उनले भने ।

त्यस्तै, प्रधानमन्त्री ओलीले चीन, भारत, अमेरिक जहाँ गएपनि नेपाल कार्ड प्रयोग गर्ने र देशको हित हुने काम गर्ने उनले बताए । ‘चाइना कार्ड प्रचण्डजीको हो । केपी शर्मा ओलीजीले चीन जाँदा पनि र भारत जाँदा पनि नेपाल कार्ड, युएन जाँदा पनि, अमेरिका जाँदा पनि उहाँले नेपाल कार्ड प्रयोग गर्नुहुन्छ । नेपालको हितमा नहुने कुनै पनि काम गर्नुहुन्न । नेपालको हितमा हुने जुनसुकै कामका लागि उहाँ आँखामा आँखा जुधाएर छलफल गर्न उहाँ तयार हुनुहुन्छ ,’– उनले भने ।

लाेक कल्याणकारी