काठमाडौं। नेकपा (माओवादी केन्द्र) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ ले आफूहरुको लडाईँ जारी नै रहेको बताएका छन् । आज (बुधबार) गणतन्त्र सेनानी कोषले आयोजना गरेको कार्यक्रमलाई सम्बोधन गर्दै उनले देशमा नयाँ क्रान्ति आवश्यक रहेको र आफूहरु निरन्तर लडाईँमै रहेको बताएका हुन् । देशलाई प्रतिगमनतिर लाने र जनयुद्ध र जनआन्दोलनमार्फत प्राप्त उपलब्धी जोगाउन आफूहरु लडाइँमै रहेको बताए ।

‘हाम्रो लडाईँ टुङ्गिएको छैन, जारी नै छ । हामी जतिबेला जनयुद्धको उत्कर्षमा जाँदै थियौं, अहिले प्रमुख भनिएका पार्टीहरु नै सरकारमा थिए । हामी क्रान्ति, विद्रोहमा थियौं । उनीहरु सत्तापक्ष थिए, हामी विद्रोहीपक्षमा थियो । अहिले घुम्दैफिर्र्दै परिस्थिति त्यही दिशामा जाँदैछ,’– उनले भने ।

साथै, उनले अब माओवादीले कसैको वैशाखी नटेकी अगाडि बढ्ने उद्घोष गरे । उनले माओवादी अब आफ्नै खुट्टामा उभिएर अगाडि बढ्ने बताए । माओवादीलाई अपमानित गर्न खोज्ने प्रवृत्तिको विरुद्धमा लडाईँ लडिराख्ने उनले बताए । ‘म त आफ्नो बाटो लागिसकेँ । माओवादीले अब कसैको वैशाखी टेक्दैन । माओवादीले अब आफ्नै खुट्टामा उभिएर लड्छ । माओवादीलाई अपमानित गर्न खोज्ने सबै प्रवृत्तिको विरुद्ध हामी लडाइँ लड्छौं,’– उनले भने ।

लाेक कल्याणकारी