काठमाडौं । नेकपा (एमाले) का अध्यक्ष केपी शर्मा ओलीले एकल बहुमतको सरकार नबनेसम्म देश विकास हुन नसक्ने बताएका छन् । आज (शनिबार) झुलाघाट—चिवाभञ्ज्याङ यात्राका क्रममा पाँचथरको फिदिममा आयोजित सभालाई सम्बोधन गर्दै उनले एकल बहुमतको सरकार नबनेसम्म राजनीतिक अन्यौलता र अराजकता बढिरहने बताएका हुन् ।
‘अहिले राजनीतिक अन्यौलता र अराजकता बढेको छ । अब एकल बहुमतको सरकार नबनेसम्म देशको विकास हुन सक्दैन,’– ओलीले भने । साथै, आगामी ०८४ सालको निर्वाचनमा एमालेले एकल बहुमत ल्याएर बलियो सरकार निर्माण गर्ने र देश विकास, सुशासन र सामाजिक न्यायको पक्षमा काम गर्ने उनले बताए । साथै, देश विकासका लागि सरकारले शान्तिको प्रत्याभूति दिलाउन सक्नुपर्ने उनले बताए । अहिलेको सरकार जनतालाई शान्ति र सुरक्षाको प्रत्याभूति दिलाउने कर्तब्यबाट चुकेको उनले बताए ।
विदेशीको अगाडि बोल्न नसक्ने कम्फर्टेबल सरकार नेपाल र नेपालीका लागि हितकर नरहेको उनले सुनाए । साथै, एमालेले सरकार छाडको २ वर्षमै देश कङ्गाल बन्न लागेको र अर्थतन्त्र डामाडोल बनेको उनको भनाई छ । एमालेले देश बनाउने संकल्पसहित अभियानको थालनी गरेको समेत उनले बताए ।
देशको विकास अरुको भलाइका लागि नभएर देश र जनताको भलाइका लागि हुनुपर्ने उनले बताए । उनले सबै नेपाली एकतावद्ध भएर, उत्पानदन, उत्पादकत्व र विकासका काममा लाग्न आवश्यक रहेको बताए । देशको विकास, सुशासन, समृद्धि एमालेको नेतृत्वमा मात्रै सम्भव भएको उनले बताए ।
