काठमाडौं | प्रतिनिधि सभाको बैठकमा नेकपा एमालेको तर्फबाट प्रधानमन्त्रीमा निर्वाचित नेपाली कांग्रेसका सभापति शेरबहादुर देउवालाई सुवास नेम्वाङले बधाई दिएका छन् । बधाई दिँदादिँदै उनले केही प्रश्न पनि उठाएका छन् । सर्वोच्च अदालतले गरेका निर्णयहरुको आलोचना गर्दै नेम्वाङले प्रधानमन्त्रीमा देउवा परमादेशबाट आएको उल्लेख गरेका छन् ।
‘केही पहिले उहाँले आफूहरुले सरकारमा जान जनताबाट जनादेश नपाएकाले सरकारमा नजाने बताउनु भएको थियो,’ प्रधानमन्त्री देउवालाई इंगित गर्दै सुवास नेम्वाङले भनेका छन्, ‘अहिले म प्रश्न गर्न चाहन्छु– तपाईंले कहिले र कहाँबाट पाउनु भयो जनादेश ?’
नेम्वाङले संसदमा बोल्दै ताजा जनादेशमा जाने कुरालाई निरंकुश भन्न नहुने भन्दै यसबारे छलफल गर्न आवश्यक रहेको पनि बताएका छन् ।
उनले राज्यका सबै अंगबीच नियन्त्रण र सन्तुलन हुन जरुरी रहेको पनि बताएका छन् ।‘सर्वोच्चको फैसलाका कारण राज्यका तीन अंगबीच सन्तुलन कता कता खलबलिएको छ कि भन्ने छ,’ नेम्वाङले भनेका छन् ।
