एमाले विवाद समाधान उन्मुख भएका बेला माओवादी केन्द्रका अध्यक्ष पुष्पकमल दाहाल प्रचण्डले माधव नेपाललाई भेटेका छन् । नेता नेपाल भेट्न शनिबार अपराह्न प्रचण्ड उनकै निवास कोटेश्वर पुगेका हुन् ।
केपी ओली र नेपाल पक्षीय कार्यदल विवादित विषयमा सहमति नजिक पुगेको भनिएका बेला विपक्षी गठबन्धन आवद्ध दुई नेताबीचको भेटलाई अर्थपूर्ण मानिएको छ । भेटमा नेता नेपालले विपक्षी गठबन्धनलाई प्रतिकूल प्रभाव पर्ने गरी ओलीसँग कुनै सहमति नहुने आश्वासन प्रचण्डर्ला दिएका छन् ।
नेता नेपालले ओलीले आफ्नो सत्ता संकट समाधानका लागि सहमतिका नाममा आफूहरुलाई झुक्याउन खोजेकाले तत्काल सहमतिको सम्भावना नरहेको बताएको प्रचण्डको निजी सचिवालय श्रोतको दाबी छ ।
‘उहाँले विपक्षी गठबन्धनलाई प्रभावित पार्ने गरी कुनै सम्झौता नहुने बताउनुभएको छ’, खुमलटार श्रोतले नेपालको भनाइ उद्दृत गर्दै भन्यो, ‘हामीले समान मुद्दा र एजेण्डामा आधारित रहेर गरेको सहकार्य टुट्दैन, माधव नेपालबाट कुनै धोका हुँदैन ।’
