पर्वत । पर्वतको तिलाहारमा जन्मिएका सामाजिक अभियान्ता तथा समाजसेबी सफल व्यवसायी रविजंग लामिछानेले कोरोना महामारीका बेला आफ्नै जन्मभूमिमा निकै ठुलो संख्यामा स्वास्थ्य सुरक्षा सामग्री सहयोग पठाएका छन् ।
उनले पर्वत र म्याग्दीका दुई विद्यालय एवं पर्वतको एक स्वास्थ्य चौकीलाई कुल १० हजार मास्क प्रदान गरेका हुन् । पर्वत जिल्लाको मोदी गाउँपालिका वडा नम्बर ६ तिलाहारस्थित नवजागृत माध्यमिक विद्यालय, म्याग्दीको मंगला माध्यमिक विद्यालय र पर्वत तिलाहार स्वास्थ्यचौकीका लागि उनले स्वास्थ्य सुरक्षा सामग्री प्रदान गरेका हुन् ।
समाजसेवी लामिछानेले पठाएका १० हजार थान मास्क, स्यानिटाइजर र ह्यान्डवास लगायतका सामग्री उनकै दिदी इन्दु लामिछानेले हस्तान्तरण गरेकी छन् । कोरोना भाइरसको संक्रमण तीव्र रुपमा फैलिरहेका बेला स्थानीय विद्यालयमा अध्ययनरत बालबालिकाको सुरक्षामा सहयोग पुगोस् भनेर सुरक्षा सामग्री पठाएको लामिछानेले बताए ।
महामारीका बेला समेत पर्याप्त मात्रामा आधारभूत सुरक्षा सामग्री नरहेको स्वास्थ्य चौकीमा पनि आफ्नो सहयोगबाट मद्धत पुग्ने आशा उनले राखेका छन् । बेलायतमा एक सफल नेपाली व्यवसायीका रुपमा स्थापित लामिछानेले नेपाल सरकारको कोरोना राहत कोषमा पनि १५ लाख रुपैंया सहयोग पठाइसकेका छन् ।
सामाजिक कार्यहरुमा सधै अगाडि उनले नेपालमा ठूलो रकम खर्चिएर कयौं मन्दिरहरुको स्थापना गराएका छन् । सामाजिक क्षेत्रमा पनि उनले दशौं लाख रुपैंयाको सहयोग बाँडिसकेका छन् । केही वर्षअघि नेपालमा महाभूकम्पको बेला मात्रै उनले नेपाल सरकारमार्फत् ५१ लाख रुपैयाँ सहयोग प्रदान गरेका थिए ।
बेलायतको अल्डरसटमा निर्माणाधिन शिव मन्दिरको लागि समेत लामिछानेले १५ हजार पाउण्ड बढीको आर्थिक सहयोग र साढे ४ सय किलो तौलका मूर्तिहरु प्रदान गरेका छन् ।
