काठमाडौं । अहिले नेपाल–भारतबीचको सीमा विवाद एकदम चर्चामा रहेको छ । भारतले नेपाली भूमि मिचेर सडक निर्माण गरेर विवादलाई थप संकटमा पारेको छ । भारतले नेपालको कालापानी, लिपुलेक र लिम्पियाधुरामा आफ्नो नियन्त्रण जमाएर बसेको छ । मानसरोवर जानका लागि भन्दै भारतले हालै लिपुलेकमा सडक उद्घाटन गरेको थियो ।
भारतलाई काउन्टर गर्न अब नेपालले पनि सडक निर्माण सुरु गरेको छ । भारत–नेपाल सीमामा भइरहेको तनावको बीचमा नेपाल सरकारले १३० किलोमिटर लामो धार्चुला–तिनकर सडक निर्माण सुरु गरिसकेको छ । भारतीय सञ्चारमाध्यमहरुमा आएको रिपोर्टका अनुसार यस सडक परियोजनालाई सन् २००८ मा नेपाल–चीन व्यवसाय प्रवर्द्धनको लागि अनुमोदन गरिएको थियो ।
समाचारमा उल्लेख भए अनुसार यस सडकको लगभग ५० किलोमिटर उत्तराखण्डको सिमानामा रहेको भारत–नेपाल सीमासँग समानान्तर देखिन्छ । वितेको १२ बर्षमा यस सडक परियोजनामा केवल ४३ किलोमिटर लामो सडकहरू मात्र निर्माण गरिएको थियो ।
अब नेपाल सरकारले यस परियोजनाको काम पुनः सुरु गरी सेनाले बाँकी सडकको निर्माण कार्य सम्पन्न गर्ने निर्णय गरेको छ । यसमा भारतीय पक्षले कुनै अवरोध सिर्जना गरेको छैन । यसरी हेर्दा भारत अलिक नरम भएको हो कि भन्ने अनुमान लगाउन सकिन्छ । सामान्यतया सीमा क्षेत्रमा हुने भौतीक निर्माणलाई भारत अवरोध पुर्याउँदै आएको छ ।
