सुचनाकेन्द्र संवाददाता प्रकाशित : २०७६/१०/७ गते
काठमाडौं – कम्युनिस्ट प्रधानमन्त्री केपी शर्मा ओली नेतृत्वको सरकारको शासनमा नेपाल सरकारको सार्वजनिक ऋण ११ खर्ब रुपैयाँ पुगेको छ ।अर्थ मन्त्रालयद्वारा सार्वजनिक गरिएको तथ्यांक अनुसार मंसिर महिनासम्म नेपालको ऋण १० खर्ब ९८ अर्ब पुगेको हो ।
ऋणमध्ये ६ खर्ब ४६ अर्ब ९५ करोड रुपैयाँ वैदेशिक ऋण रहेको छ भने ४ खर्ब ५१ अर्ब ५५ करोड रुपैयाँ आन्तरिक ऋण रहेको जनाइएको छ । सरकारको ऋणलाई देशको कूल जनसंख्या २ करोड ९८ लाख ३० हजार ५ सय ४७ जनाले भाग गर्दा हरेक नेपालीको थाप्लोमा ३६ हजार ८ सय ८ रुपैयाँ ऋण हुन आउँछ ।
चालू आर्थिक वर्षको पहिलो पाँच महिनामा सरकारले १ अर्ब ९४ करोड आन्तरिक र ७ अर्ब ३० करोड बाह्य ऋण तिरेको छ । आन्तरिक ऋणको ८ अर्ब ८९ करोड रुपैयाँ र बाह्य ऋणको १ अर्ब ५० करोड रुपैयाँ ब्याज पछिल्लो ५ महिनामा सरकारले भुक्तानी गरेको जनाइएको छ ।
