पर्वत । प्रधानमन्त्री रोजगार कार्यक्रमसँगको साझेदारीमा पर्वतको मोदी गाउँपालिका–५ पातिचौरस्थित पार्वती मन्दिरदेखि मोदीघाटसम्म निर्माण भइरहेको गोरेटो बाटो अन्तिम चरणमा पुगेको छ।

स्थानीयवासीको आवागमनलाई सहज, सुरक्षित र व्यवस्थित बनाउने उद्देश्यले सञ्चालन गरिएको उक्त आयोजनाले धार्मिक, सामाजिक तथा पर्यटन गतिविधिको प्रवर्द्धनमा समेत टेवा पुग्ने अपेक्षा गरिएको छ। बाटो निर्माणसँगै यसको दीर्घकालीन संरक्षण र वातावरणीय सौन्दर्य अभिवृद्धिका लागि दुवै किनारमा वृक्षरोपण अभियानसमेत सञ्चालन गरिएको गाउँपालिकाले जनाएको छ।

प्रधानमन्त्री रोजगार कार्यक्रममार्फत स्थानीय बेरोजगार नागरिकलाई रोजगारी उपलब्ध गराउँदै श्रममा आधारित पूर्वाधार निर्माणलाई प्रभावकारी बनाइएको रोजगार सेवा केन्द्रका प्रमुख अनमोल केसीले बताउनुभयो। उहाँका अनुसार निर्माण सम्पन्न भएपछि स्थानीय बासिन्दा, पार्वती मन्दिरमा दर्शन गर्न आउने भक्तजन तथा मोदीघाट पुग्ने पर्यटकलाई सुरक्षित र सहज आवतजावतमा ठूलो सहयोग पुग्नेछ।

गाउँपालिकाले प्रधानमन्त्री रोजगार कार्यक्रममार्फत स्थानीयस्तरमा रोजगारी सिर्जना गर्नुका साथै आवश्यक पूर्वाधार विकासलाई सँगसँगै अघि बढाउने नीति लिएको जनाएको छ। यस कार्यक्रमले स्थानीय नागरिकलाई आयआर्जनको अवसर उपलब्ध गराउनुका साथै गाउँपालिकाभित्रका धार्मिक तथा पर्यटकीय स्थलको पहुँच विस्तार गर्न समेत महत्त्वपूर्ण योगदान पुर्‍याएको विश्वास गरिएको छ।

लाेक कल्याणकारी