पर्वत  । पर्वतको प्रसिद्ध गुप्तेश्वर गुफाको संरक्षण, प्रवर्द्धन तथा व्यवस्थापनमा सक्रिय गुप्तेश्वर धार्मिक तथा पर्यटकीय संस्थाको अध्यक्षमा सन्तु गिरी सर्वसम्मत चयन हुनुभएको छ। संस्थाको २४औँ साधारणसभा तथा अधिवेशनले सन्तु गिरीको नेतृत्वमा ११ सदस्यीय नयाँ कार्यसमिति सर्वसम्मत चयन गरेको हो। नवगठित कार्यसमितिमा कमलकान्त पाध्या, मानकुमारी गिरी, कृष्णराज पौड्याल, प्रनिश गिरी, गोविन्द अधिकारी, सरिता चापागाई, कविन्द्र केसी, इन्दिरा केसी र कृष्ण शर्मा आचार्य सदस्य चयन हुनुभएको छ। नवनिर्वाचित कार्यसमितिलाई सामाजिक व्यक्तित्व लोकनाथ आचार्यले टिका र खादा लगाएर शुभकामना दिनुभएको थियो।

नवनिर्वाचित अध्यक्ष गिरीले गुप्तेश्वर क्षेत्रको संरक्षण, धार्मिक पर्यटनको विकास, सरसफाइ, प्रचारप्रसार र पूर्वाधार विकासलाई प्राथमिकतामा राख्दै स्थानीय समुदाय, साधु रामअवतार बाबाजी तथा सरोकारवाला निकायसँग सहकार्य गरेर अघि बढ्ने प्रतिबद्धता व्यक्त गर्नुभयो।

अधिवेशनका वक्ताहरूले गुप्तेश्वर गुफाको धार्मिक, ऐतिहासिक तथा पर्यटकीय महत्वलाई थप उजागर गर्दै दीर्घकालीन विकास योजनालाई प्रभावकारी रूपमा कार्यान्वयन गर्नुपर्नेमा जोड दिएका थिए।

एसियाकै अलौकिक र लामो गुफामध्ये एक मानिने साततले गुप्तेश्वर गुफाको संरक्षण र प्रवर्द्धनमा नयाँ कार्यसमितिले प्रभावकारी भूमिका खेल्ने अपेक्षा गरिएको छ।

लाेक कल्याणकारी