पर्वत ।जन्मदेखि २७ महिनासम्मका सबै बालबालिका पूर्ण खोपको पहुँचमा पुगेपछि पर्वतलाई पूर्ण खोप सुनिश्चित तथा दिगोपना भएको जिल्ला घोषणा गरिएको छ।

मंगलबार सदरमुकाम कुश्माबजारमा आयोजित कार्यक्रममा जिल्ला समन्वय समिति प्रमुख विष्णुराम विकसहित जनप्रतिनिधि, स्वास्थ्यकर्मी, कर्मचारी र सरोकारवालाले प्रतिबद्धतापत्रमा हस्ताक्षर गर्दै जिल्लालाई पूर्ण खोप सुनिश्चित भएको घोषणा गरेका हुन्।

जिल्ला खोप समन्वय समितिका अनुसार जन्मदेखि १५ महिनासम्मका १ हजार ४३९ र १६ देखि २३ महिनासम्मका ८९२ बालबालिकाले पूर्ण मात्रा खोप प्राप्त गरेको सुनिश्चित भएपछि जिल्ला घोषणा गरिएको हो। यसअघि जिल्लाका सातै स्थानीय तह र ६१ वटै वडा पूर्ण खोप सुनिश्चित घोषणा भइसकेका थिए।

कार्यक्रममा जिल्ला समन्वय समिति प्रमुख विष्णुराम विकले पूर्ण खोप सुनिश्चितता पर्वतका लागि गौरवको विषय भएको बताउँदै यसको दिगोपनाका लागि सबै पक्षबीचको सहकार्य अझ सुदृढ बनाउनुपर्ने धारणा राख्नुभयो।

गण्डकी प्रदेश स्वास्थ्य मन्त्रालयका अतिरिक्त सचिव खिमबहादुर खड्काले बालबालिकालाई विभिन्न संक्रमणबाट जोगाउन खोपको सबै मात्रा अनिवार्य रूपमा लगाउन अभिभावकलाई आग्रह गर्नुभयो।

कार्यक्रममा प्रमुख जिल्ला अधिकारी लक्ष्मीप्रसाद पौडेल, नेपाल पत्रकार महासंघ पर्वतका अध्यक्ष लक्ष्मण सापकोटा तथा प्रदेश जनस्वास्थ्य कार्यालय पर्वतका प्रमुख बद्रीराज आचार्यले नियमित खोप सेवा र समुदायको सक्रिय सहभागिताबाट पर्वतले राष्ट्रिय मापदण्ड पूरा गर्दै पूर्ण खोप सुनिश्चितता हासिल गरेको बताएका छन्।

लाेक कल्याणकारी