पर्वत — पर्वतको मोदी गाउँपालिकाले १८ वर्षदेखि बन्द अवस्थामा रहेको माटे लेकको स्लेट (ढुंगा) खानी पुनः सञ्चालन गर्ने तयारी थालेको छ। गाउँपालिकाको १९औँ गाउँसभाबाट पारित आगामी आर्थिक वर्षको नीति तथा कार्यक्रममा खानी सञ्चालनका लागि सम्भाव्यता अध्ययन, संघीय तथा प्रदेश सरकारसँग समन्वय र आवश्यक प्रक्रिया अघि बढाउने योजना समावेश गरिएको हो।

मोदी गाउँपालिका–१ भुकताङ्ले, वडा नं. ३ देउराली र वडा नं. ४ क्याङको सिमानामा रहेको माटे लेकको स्लेट खानी धौलागिरि क्षेत्रकै ठूलो खानीका रूपमा परिचित छ। तत्कालीन भुकताङ्ले, देउराली र क्याङ गाविसबीचको सिमाना विवादका कारण वि.सं. २०६४ सालदेखि खानी बन्द भएको थियो।

गाउँपालिका अध्यक्ष हिरादेवी शर्माले राजस्व वृद्धि, स्थानीय रोजगारी सिर्जना तथा प्राकृतिक स्रोतको सदुपयोग गर्ने उद्देश्यले खानी सञ्चालनको योजना अघि सारिएको बताउनुभयो। सम्भाव्यता अध्ययनसँगै पहुँचमार्ग निर्माण लगायतका आवश्यक पूर्वाधारका लागि बजेट समेत विनियोजन गरिएको उहाँले जानकारी दिनुभयो। खानी सञ्चालनमा आएपछि गाउँपालिकाले वार्षिक करोडौं रुपैयाँ आम्दानी गर्न सक्ने अपेक्षा गरिएको छ।

सिमाना विवादका कारण लामो समयदेखि बन्द रहेको खानीबाट स्थानीय बासिन्दा र स्थानीय सरकारले आर्थिक अवसर गुमाउँदै आएका छन्। तत्कालीन क्याङ गाविसका पूर्व अध्यक्ष नरसिंह पुनका अनुसार तीनवटै गाविसले खानी आफ्नो क्षेत्रमा पर्ने दाबी गरेपछि विवाद बढ्दै गएर अन्ततः खानी बन्द गरिएको थियो। विवादपछि सामुदायिक वनअन्तर्गत रहेको क्षेत्रलाई तत्कालीन जिल्ला वन कार्यालयले राष्ट्रियकरण गरेको थियो।

गाउँपालिकाले नीति तथा कार्यक्रममा खानी पुनः सञ्चालनको योजना समेटेपछि स्थानीयवासीमा पुनः सञ्चालन हुने आशा बढेको छ।

लाेक कल्याणकारी