पर्वत ।पर्वतको जलजला गाउँपालिका–४ मोहनचोककी जमुना आचार्य जलजला गाउँपालिकाकी सर्वोत्कृष्ट उद्यमी घोषित भएकी छन्। गण्डकी प्रदेश सरकार, जलजला गाउँपालिका र दायित्व संस्थाको सहकार्यमा सञ्चालित वृद्धिमुखी उद्यमशीलता तथा रोजगारी प्रवर्द्धन कार्यक्रमअन्तर्गत उनलाई नगद एक लाख ५० हजार रुपैयाँसहित सम्मान गरिएको हो।

बाल्यकालमै देब्रे हात गुमाएकी आचार्यले सञ्चालन गर्दै आएको ‘टपरी एग्रो’ले स्थानीय कृषि तथा पशुजन्य उत्पादनको संकलन, प्रशोधन र बजारीकरणमा उल्लेखनीय योगदान पुर्‍याउँदै आएको छ। उत्कृष्ट १० उद्यमीबीच भएको अन्तिम लगानी प्रस्तुतिमा सबैभन्दा बढी अंक प्राप्त गरेपछि उनी सर्वोत्कृष्ट घोषित भएकी हुन्।

कार्यक्रममा उत्कृष्ट १० भित्रका अन्य नौ उद्यमीलाई पनि जनही एक लाख रुपैयाँसहित सम्मान गरिएको छ। कार्यक्रममा बोल्दै गाउँपालिका तथा प्रदेश सरकारका प्रतिनिधिहरूले उद्यमशीलता, रोजगारी सिर्जना र स्थानीय उत्पादनको प्रवर्द्धनमा यस्तो कार्यक्रम प्रभावकारी बनेको बताएका छन्।

प्रदेश सरकार, गाउँपालिका र दायित्व संस्थाको संयुक्त लगानीमा सञ्चालित कार्यक्रमले स्थानीय उद्यमीलाई तालिम, प्रविधि सहयोग, अनुदान तथा बजार व्यवस्थापनमा सहयोग गर्दै आएको छ।

लाेक कल्याणकारी