पर्वत । जिल्ला प्रहरी कार्यालय पर्वतको आयोजनामा समुदाय–प्रहरी साझेदारी जिल्ला समितिलाई थप कृयाशिल बनाउने उद्देश्यले समिति पुनर्गठन कार्यक्रम सम्पन्न भएको छ।

जिल्ला प्रहरी कार्यालय पर्वतका प्रमुख प्रहरी उपरीक्षक लक्ष्मी प्रसाद पौडेलको संयोजकत्वमा कुश्मा नगरपालिका–५ स्थित जिल्ला प्रशासन कार्यालय पर्वतको सभाहलमा आयोजित कार्यक्रममा जिल्ला स्थित सरोकारवाला निकाय, विभिन्न संघ–संस्था तथा स्थानीय तहका प्रतिनिधिहरूको सहभागिता रहेको थियो।

कार्यक्रममा समुदाय–प्रहरी साझेदारी जिल्ला समितिले जिल्ला स्तरमा समुदाय–प्रहरी कार्यक्रमको योजना, समन्वय, सञ्चालन, अनुगमन तथा मूल्याङ्कन गर्ने उद्देश्य र अवधारणाबारे प्रहरी नायब उपरीक्षक विजय यादवले प्रकाश पार्नु भएको थियो। सहभागी वक्ताहरूले समुदायका समस्या पहिचान गरी टोल–टोलमा साझेदारी जिम्मेवारीका साथ सक्रिय भूमिका निर्वाह गर्नुपर्नेमा जोड दिएका थिए।

नगर प्रमुख रामचन्द्र जोशीले समुदायमा नागरिकमैत्री व्यवहारको वातावरण सिर्जना गर्न समिति सदैव कृयाशिल रहने प्रतिबद्धता व्यक्त गर्नुभयो। त्यसैगरी समन्वय प्रमुख विष्णुराम वि.क.ले समाज तथा व्यक्तिको हक–हित संरक्षणका लागि सुरक्षा प्रदायक समितिको भूमिकालाई प्रभावकारी रूपमा कार्यान्वयन गर्न आवश्यक समन्वय र सहजीकरण गर्ने धारणा राख्नुभयो।

कार्यक्रमको समापन गर्दै प्रहरी उपरीक्षक लक्ष्मी प्रसाद पौडेलले जिल्ला समिति कृयाशिल रहने, पालिका स्तरमा समन्वय र अनुगमन गर्ने, मासिक बैठकलाई निरन्तरता दिने तथा प्रतिनिधि सभा सदस्य निर्वाचन २०८२ लाई निष्पक्ष र शान्तिपूर्ण रूपमा सम्पन्न गर्न सबै पक्षबाट पहल गरिने प्रतिबद्धता व्यक्त गर्नुभयो।<

लाेक कल्याणकारी