पर्वत । पर्वतको कुश्मा नगरपालिका–१४ आर्थरमा रहेको शुभकल्याण आधारभूत विद्यालयको ६४ औँ वार्षिकोत्सवको अवसरमा हाजिरी जवाफ प्रतियोगिता सहितका अन्य प्रतियोगिताहरू सम्पन्न भएका छन् ।

आधारभूत तह (१–५) का विद्यार्थीहरू मात्रै सहभागी हुने गरी आयोजना भएको प्रतियोगितामा कुश्माको नमुना आवासीय माध्यमिक विद्यालय प्रथम, कुश्माको कालीगण्डकी एकेडेमी द्वितीय, बितलबको पूर्णेश्वर माध्यमिक विद्यालय तृतीय र आयोजक शुभकल्याण आधारभूत विद्यालय सान्त्वना स्थानमा आएका छन् । प्रथम बनेको नमुनाले पुरस्कार स्वरूप १० हजार रुपैयाँ सहित शिल्ड, मेडल र प्रमाणपत्र पाएको छ । यस्तै दोस्रो, तेस्रो र सान्त्वना स्थानमा आएका विद्यालयहरूले क्रमशः सात हजार, पाँच हजार र तीन हजार रुपैयाँ सहित प्रमाणपत्र प्रदान गरिएको छ । दूरी प्रोत्साहन पुरस्कार कटुवाचौपारीको आइबल एकेडेमीलाई दिइएको छ ।

यस्तै महिला शिक्षक दौड प्रतियोगितामा आयोजक शुभकल्याण आधारभूत विद्यालयकी रिता गौतम प्रथम र जनएकता आधारभूत विद्यालयकी पूर्णिमा रिमाल द्वितीय भएकी छिन् । टपरी गाँस्ने प्रतियोगितामा मिना रिमाल प्रथम र शारदा रिमाल द्वितीय भएकी छन् । वार्षिकोत्सव समारोहका अवसरमा उत्कृष्ट वर्ष शिक्षकको रूपमा शुभकल्याण आधारभूत विद्यालयकी अनिता बि.क.लाई सम्मान गरिएको छ । यस्तै हालसम्मका प्रधानाध्यापकहरूलाई सम्मान, विद्यालय व्यवस्थापन समितिका हालसम्मका अध्यक्षहरूलाई सम्मान तथा विद्यालयका सहयोगदाताहरूलाई पनि सम्मान गरिएको विद्यालयका प्रधानाध्यापक सुरेन्द्र शर्मा गौतमले बताए ।

कार्यक्रमका प्रमुख अतिथि गण्डकी प्रदेश सामाजिक विकास युवा तथा खेलकुद मन्त्रालयका उपसचिव घनश्याम पौडेल रहेका थिए । यस्तै शिक्षा विकास तथा समन्वय इकाई पर्वतका प्रमुख मतिलाल चपाइ, कुश्मा नगरपालिकाका शिक्षा अधिकृत दीपक सुवेदी, वडाका जनप्रतिनिधिहरू तथा जिल्लाका विभिन्न विद्यालयका प्रधानाध्यापक तथा प्रतिनिधिहरूको सहभागिता रहेको थियो । विद्यालय व्यवस्थापन समितिका अध्यक्ष मेघराज रिमालको अध्यक्षतामा भएको कार्यक्रममा स्वागत प्रधानाध्यापक गौतमले गरेका थिए भने कार्यक्रमको सञ्चालन शिक्षक रिता गौतमले गरेकी थिइन् ।

लाेक कल्याणकारी