पर्वत।  जिल्लाको कुश्मा नगरपालिकाले नगर क्षेत्रभित्र सञ्चालनमा रहेका सहकारी संस्थालाई कोपोमिस (कोअपरेटिभ एन्ड पभर्टी म्यानेजमेन्ट इन्फमेसन सिस्टम) प्रणालीमा अद्यावधिक हुन निर्देशन दिएको छ ।

नगरपालिकाको कार्यालयका प्रमुख प्रशासकीय अधिकृत किरण पौडेलद्धारा जारी सूचनामा सहकारीहरुलाई आफ्ना विवरणहरु अनिवार्य रूपमा अद्यावधिक गर्न भनिएको छ । सहकारी ऐन २०७४, दफा ३३, उपदफा १ तथा सहकारी नियमावली २०७५ को नियम २८(५) बमोजिम प्रत्येक सहकारी संस्थाले आफ्नो संस्थागत तथा व्यवसायिक कारोबारसम्बन्धी विवरण नियमित रूपमा यो प्रणालीमा प्रविष्ट गर्नुपर्ने व्यवस्था रहे अनुसार सहकारीहरु अद्यावधिक अवस्थामा रहनुपर्ने सूचनामा उल्लेख छ ।

नगरपालिकाका अनुसार हालसम्म नगरको नियमन क्षेत्रभित्र रहेका ७० वटा सहकारी संस्थामध्ये केही संस्थालाई युजर आइडी र पासवर्ड वितरण गरिसकिएको छ । युजर आइडी र पासवर्ड प्राप्त गरिसकेका सहकारी संस्थाले समष्टिगत विवरण, सदस्यहरूको के.वाई.एम विवरण लगायत सम्पूर्ण विवरण प्रणालीमा पूर्ण रूपमा अद्यावधिक गर्नुपर्ने छ ।

युजर आइडी तथा पासवर्ड नपाएका सहकारी संस्थाहरूले आवश्यक कागजातसहित १५ दिनभित्र नगरपालिकाको सहकारी शाखामा निवेदन दिनुपर्ने सूचनामा उल्लेख छ । साथै, युजर आइडी तथा पासवर्ड परिवर्तन गर्नुपर्ने सहकारी संस्थाहरूले पनि सम्बन्धित शाखामा सम्पर्क गर्न आग्रह गरिएको छ । त्यसका लागि सहकारी संस्थाले संस्था दर्ता प्रमाणपत्र, पान नम्बर प्रमाणपत्र, कार्यक्षेत्र विवरण तथा बैंक खाता नम्बर, संस्थाको इमेल र कर चुक्ता प्रमाणपत्र समावेश गर्नुपर्ने छ ।

नगरपालिकाले ऐन, नियमावली तथा निर्देशिका बमोजिम विवरण अद्यावधिक नगर्ने सहकारी संस्थालाई कानुनअनुसार आवश्यक प्रक्रिया अघि बढाइने चेतावनीसमेत दिएको छ ।

लाेक कल्याणकारी