पर्वत । मोदी गाउँपालिका गाउँसभाको १८ औँ अधिवेशन सम्पन्न भएको छ । मंगलवार गाउँपालिकाको सभाहलमा सम्पन्न भएको अधिवेशनले विभिन्न कार्यक्रम संशोधन, ऐनहरु संशोधन तथा विधेयकहरु सर्वसम्मत पारित गरेको छ ।

सभामा उपाध्यक्ष बिमल लामिछानेले प्रस्तुत गर्नुभएकोे आर्थिक वर्ष ०८२/०८३ को बजेट योजना कार्यक्रम संशोधन रकमान्तर तथा श्रोतान्तर सर्वसम्मत रुपमा पारित भएको हो । यसैगरी आर्थिक कार्यविधि तथा वित्तिय उत्तरदायी सम्वन्धि विधेयक, आर्थिक ऐन २०८२ संशोधन प्रस्ताव, बिनीयोजन ऐन २०८२ संशोधन प्रस्ताव, विज्ञापन ब्यवस्थापन तथा नियमन गर्ने सम्वन्धमा व्यवस्था गर्न बनेको विधेयक २०८२ सर्वसम्मत रुपमा पारित गरिएको छ ।

गाउँपालिकाले अबदेखि विज्ञापन, होर्डिङ्गबोर्ड, पर्चा पम्प्लेट, भित्तेलेखन लगायतका प्रचारमुखि सामाग्रीहरुलाई ब्यवस्थापन गर्ने भएको छ । गाउँपालिका भित्र विज्ञापन गर्नका लागि अब अनुमति लिनुपर्ने र पालिकाको नीति अुनसार बार्षिक रुपमा राजश्व भुक्तानी गर्नुपर्ने विधेयक सर्वसम्मत रुपमा पारित भएको प्रमुख प्रशासकिय अधिकृत बाबुराम पुरीले जानकारी दिनुभयो । सभावाट पारित भएसँगै चालु आर्थिक वर्षदेखिनै कार्यान्वयनमा ल्याईने पुरीको भनाई छ ।

यसैगरी गाउँसभामा न्यायिक समितिको अर्धवार्षिक प्रतिवेदन समेत पेश भएको छ भने सेवा करारमा कार्यरत कर्मचारहिरुको सेवा करार, दैनिक ज्यालादारी सम्झौता नविकरण सभामा निर्णयार्थ पेश गरिएको थियो ।

सभामा बोल्दै गाउँपालिका अध्यक्ष हिरादेवी शर्माले मोदी गाउँपालिकालाई समृद्ध बनाउनका लागि कर्मचारी र जनप्र्रतिनिधिहरुले विभिन्न रचनात्मक काम गरिहेको बताउनुभयो । भौतीक पुर्वाधारको विकास सँगै शिक्षा, स्वास्थ्यको पहुँच तल्लो तहसम्म पुर्‍याउन र कृषक र उद्यमीलाई व्यावसायिक बनाउनका लागि विभिन्न प्रोत्साहनमुलक कार्यक्रम संचालन गरिएको बताउनुभयो । उहाँले नागरिकहरु आत्मनिर्भर हुने खालका कार्यक्रम पालिकाले संचालन गर्दै आएको बताउँदै पालिकावासी नागरिकका चाहाना र आवश्यकता पुरा गर्न हरदम प्रयासरत रहेको बताउनुभयो ।

सभामा चालु र पुँजीगत गरि झण्डै डेढ करोड रकम रकमान्तर र श्रोतान्तर गरिएको थियो ।

लाेक कल्याणकारी