पर्वत। नेपाली काँग्रेस पर्वतका पुर्व पार्टी सभापति नबराज गुरुङले आगामी फागुन २१ गते हुने प्रतिनिधि सभाको निर्वाचनमा उम्मेदवार बन्ने आकांक्षा व्यक्त गर्नुभएको छ । सोमवार कुश्मामा पत्रकार सम्मेलन गर्दै गुरुङले पर्वत काँङ्ग्रेसलाई बृहद एकताबद्ध गर्दै प्रत्यक्ष तर्फको उम्मेदवार बन्ने संकेत गर्नुभएको हो । नेपाली काँग्रेस पर्वतले आज प्रतिनिधि सभा सदस्य पदको निर्वाचनका लागि प्रत्यक्ष र समानुपातीक तथा राष्ट्रिय सभा सदस्य पदका लागि उम्मेदवार सिफारीस गर्ने सम्वन्धमा छलफल गर्न बैठक आव्हान गरेको पुर्व सन्ध्यामा गुरुङले पत्रकार सम्मेलन गर्दै प्रत्यक्ष निर्वाचनमा उम्मेदावारी दिने बताउनुभएको हो ।
नेपाली काँग्रेसभित्र बृहद एकताको खाँचो रहेको बताउँदै गुरुङले अहिलेको नेतृत्वले काँङ्ग्रेसलाई समेल्न नसकेको दावी गुर्नुभएको छ । गुरुङले केन्द्रमा पनि फेरी शेरबहादुर देउवाकै नेतृत्व आवश्यक रहेको बताउनुभयो । जेनजी आन्दोलनपछि कार्यवाहकको जिम्मेवारी दिएर सिंगापुर जाँदा पुर्णबहादुर खड्काले पार्टीलाई मिलाउन सकेनन् र फेरी सभापति देउवा आफै आएर काँग्रेसलाई निकास दिन खोजेको उहाँको भनाई छ । गुरुङले आगामी निर्वाचनमा पर्वतमा सवैभन्दा बढि मत ल्याउने उम्मेदवार आफु रहेको बताउनुभएको छ । उहाँले भन्नुभयो– ‘पर्वतमा काङग्रेसलाई बलियो बनाउन मेरो ठुलो योगदान रहेको छ, मैले नबनाएको कुनै नेता र कार्यकर्ता छैनन् होला ।’ नेतृत्वले कसैलाई पाखा र कसैलाई काखा गर्न नपाईने बताउँदै गुरुङले नेपाली काँग्रेस पर्वतलाई एकतावद्ध गर्नका लागि आफु जस्तोसुकै त्याग गर्न पनि तयार रहेको बताउनुभयो ।
गुरुङले पार्टीले पटक पटक समानुपातिक सांसद बन्न आग्रह गरेपनि आफु प्रत्यक्षमै निर्वाचन लड्दै आएको बताउँदै फेरीपनि फागुन २१ मा प्रत्यक्ष सांसद बन्ने घोषणा समेत गर्नुभयो । नेता गुरुङले जेनजी आन्दोलनपछि युवाको नेतृत्व स्थापित गर्नुपर्ने आवश्यकता देखिएपनि ५२ वर्षदेखि पार्टीमा आफुले गरेको योगदानको उचित कदर हुनुपर्ने भनाई राख्नुभयो । उहाँले पार्टीलाई मजबुट बनाउनका लागि उपयुक्त पात्रको खोजी गरी उपयुक्त जिम्मेवारी दिनुपर्ने बताउनुभयो । उहाँले कसैले पद र पावरको घमण्ड नगरी आवश्यक छलफल र संवादको माध्यमवाट पार्टीलाई एकतावद्ध बनाउने मार्गमा अघि बढ्नुपर्ने धारणा समेत राख्नुभएको छ । अहिलेको निकास भनेको प्रतिनिधि सभाको निर्वाचननै भएको बताउँदै उहाँले निर्वाचन हुन नसकेको खण्डमा संसद पुर्नस्थापना हुनुपर्ने बताउनुभयो ।
