पर्वत।पर्वतको महाशिला गाउँपालिकामा सम्पन्न पाँचौं राष्ट्रपति रनिङ शिल्ड प्रतियोगिता सम्पन्न भएको छ । प्रतियोगितामा सुर्य माध्यमिक विद्यालय महाशिला १ होश्राङ्दी च्याम्पियन बनेको छ। महाशिला ३ स्थित कृष्णगोपाल स्मृति खेल मैदानमा आयोजित प्रतियोगितामा सुर्य माविले उत्कृष्ट प्रदर्शन गर्दै १० स्वर्ण, ९ रजत र १ कास्य गरी कुल २० पदक प्राप्त गर्दै पहिलो स्थान हात पारेको हो ।
प्रतियोगितामा महेन्द्र ज्योति माध्यमिक विद्यालय महाशिला ५ लुंखु ६ स्वर्ण, ४ रजत र २ कास्य गरि १२ पदक सहित उपविजेता बन्दै दोस्रो भयो। त्यस्तै ३ स्वर्ण, ७ रजत र ५ कास्य जित्दै बालारानी माध्यमिक विद्यालय महाशिला ३ बालकोट तृतीय स्थानमा रह्यो।
स्वधर्म माध्यमिक विद्यालय महाशिला ४ पाखापनी २ स्वर्ण, ३ रजत र ६ कास्यसहित सान्त्वना स्थानमा परेको छ।
प्रतियोगितामा उत्कृष्ट प्रदर्शन गर्ने विद्यालयहरूलाई ट्रफी, मेडल तथा प्रमाणपत्र प्रदान गरिएको थियो।समापन समारोहमा महाशिला गाउँपालिका अध्यक्ष इश्वरी प्रसाद भुसालले खेलकुदले विद्यार्थीमा अनुशासन, आत्मविश्वास र उत्साह वृद्धि गर्ने भएकाले यसप्रकारका प्रतियोगिताले प्रतिभा पहिचान तथा प्रोत्साहनमा महत्वपूर्ण भूमिका खेल्ने बताउनुभयो । खेलकुदमा सक्रिय रूपमा सहभागी हुन उहाँले सबै विद्यार्थीलाई आग्रह गर्नुभयो।
महाशिला गाउँपालिका वडा नं ४ का वडा अध्यक्ष तथा खेलकुद समितिका संयोजक पूर्ण बहादुर मल्लको अध्यक्षतामा सम्पन्न कार्यक्रमको सञ्चालन बेल बहादुर परियारले गर्नुभएको थियो।मंसिर १८ गतेदेखि शुरू भएको प्रतियोगितामा गाउँपालिका भित्रका १२ विद्यालयको सहभागिता रहेको थियो ।
Related Articles
