पर्वत,गोबिन्द रिजाल । पर्वत जेसीज सप्ताह–२०२५ अन्तर्गत तेस्रो दिन सशस्त्र प्रहरी चण्डिका गणको खेलमैदानमा आयोजना गरिएको मैत्रीपूर्ण फुटबल प्रतियोगिता भव्य रूपमा सम्पन्न भएको छ । पत्रकार महासङ्घ पर्वत र पर्वत जेसीजबीच भएको खेल सुरुदेखि नै रोमाञ्चक रह्यो । निर्धारित समयमा दुवै टोलीले उत्कृष्ट प्रदर्शन गर्दै खेल ४–४ को बराबरीमा टुंगिएको थियो । खेल पेनाल्टीमा पुगेपछि पर्वत जेसीजले ४–३ को नतिजासहित पत्रकार महासङ्घलाई पछि पार्दै जित हात पार्न सफल भयो ।

कार्यक्रमका प्रमुख अतिथि सशस्त्र प्रहरी उपरीक्षक कर्णसिंह धामी, अध्यक्षीय क्लबका अध्यक्ष, पत्रकार महासङ्घका अध्यक्ष, पूर्व अध्यक्षहरू तथा विभिन्न सरोकारवाला व्यक्तिहरूको उपस्थितिले कार्यक्रमलाई थप भव्य बनायो । कार्यक्रम संयोजक जेसी अर्जुनराज पुरीले स्वागत मन्तव्य दिँदै उपस्थित अतिथि, पदाधिकारी, तथा खेलाडीलाई हार्दिक धन्यवाद व्यक्त गर्दै युवालाई सही दिशा र सकारात्मक मार्गदर्शन दिन यस गतिविधि महत्वपूर्ण हुने बताए ।

सप्ताहको मुख्य संयोजन जेसी शर्मिला शर्माले सम्हाल्नुभएको थियो भने कार्यक्रम महासचिव जेसी प्रवेशराज पुरीले सुव्यवस्थित रूपमा सञ्चालन गर्नुभएको थियो । कार्यक्रमको अध्यक्षता गर्दै पर्वत जेसीजका अध्यक्ष जेसी अच्युत पौडेलले खेलकुद युवाको सीप, व्यक्तित्व र नेतृत्व उदयको साझा उत्सव भएको उल्लेख गर्दै सम्पूर्ण सहयोगीप्रति आभार प्रकट गर्नुभयो ।

मैत्रीपूर्ण फुटबल प्रतियोगिताले जेसीज सप्ताहले उद्देश्य राखेको युवा सशक्तिकरण, स्वस्थ प्रतिस्पर्धा र सामुदायिक एकताको सन्देशलाई अझ सबल बनाउँदै सफलतापूर्वक सम्पन्न भएको पर्वत जेसीजले जानकारी दिएको छ ।

लाेक कल्याणकारी