शिशिर उजाड,पोखरा ।जुनकिरीको सन्देश’ त्रैमासिक पत्रिकाका प्रधान सम्पादक ताराप्रसाद तिमिल्सीनाको निधन भएको छ ।
वि.सं. २००८ साल मंसीर १२ गते पोखरा १६ बाटुलेचौरमा जन्मिएका ७३ बर्षिय तिमिल्सीनाको गएराती आफ्नै निवासमा निधन भएको हो । लामो समयदेखि प्रोष्टेट क्यान्सरबाट पिडित उनको सोमबार बिहान सेती नदीस्थित तुलसी घाटमा अन्तिम संस्कार गरिएको छ ।
नेकपा एमालेका सांगठनिक सदस्य समेत रहेका तिमिल्सीनाको पार्थिव शरिरमा एमालेका केन्द्रिय सदस्य कृष्ण थापा र कास्की अध्यक्ष बैनबहादुर क्षेत्री अधिकारीले पार्टीको झण्डा ओढाएर अन्तिम विदाई गरेका थिए । उनलाई छोरा पवन तिमिल्सीनाले दागबत्ती दिएका थिए ।
यसअघि घरबाट तुलसीघाटसम्म शवयात्रा भएको थियो । बिभिन्न सामाजिक, धार्मिक तथा शैक्षिक क्षेत्रमा क्रियाशिल तिमिल्सीना प्रति बिभिन्न संघ संस्थाका प्रतिनिधी एवं स्थानियले श्रद्धाञ्जली अर्पण गरेका थिए । उनका श्रीमती, १ छोरा र ३ छोरी छन् ।
स्वर्गीय तिमिल्सीना हिमालय क्लवले प्रकाशन गर्ने ‘जुनकिरीको सन्देश’ त्रैमासिक पत्रिकाका प्रधान सम्पादकका साथै क्लवका पुर्व अध्यक्ष, शुक्ला साहित्य प्रतिष्ठान, भुतपुर्व विन्ध्यवासिनी विद्यार्थी मञ्चका पुर्व अध्यक्ष,वातावरण क्लवका र विन्ध्यवासिनी क्याम्पसका सल्लाहकार, स्व झलकमान गन्धर्व शालिक निर्माणका अगुवा रही महत्वपुर्ण योगदान पुर्याएका थिए ।
उनको निधनबाट समाजले एक असल अभिभावक गुमाएको समाजसेवी बसन्त तिमिल्सीनाले बताए ।तिमिल्सीनाकोिि नधनप्रति हिमालय क्लव, शुक्ला साहित्य प्रतिष्ठान, विन्ध्यवासिनी क्याम्पस, वातावरण क्लव, नेकपा एमाले वडा कमिटी पोखरा १६ लगायतका संघ संस्थाले शोक व्यक्त गरेका छन् ।
