पर्वत । जिल्ला सदरमुकाम कुश्मा बजारमा बिभिन्न कार्यक्रमको आयोजना स्थलको रुपमा चिनिँदै आएको बान्द्रेबिडी चौरलाई सौन्दर्यकरण गरिने भएको छ ।

कुश्मा नगरपालिका–६ वडाध्यक्ष ईश्वर गिरीको अध्यक्षतामा जनप्रतिनिधिहरू तथा समाजका अग्रज व्यक्तित्वहरूको उपस्थितिमा सम्पन्न बैठकले सौन्दर्यकरण, मर्मत तथा सरसफाइ कार्यलाई प्रभावकारी रूपमा सञ्चालन गर्ने उद्देश्यसहित निर्माण समिति गठन गरेको छ । बैठकमा विभिन्न सामाजिक तथा सांस्कृतिक विकाससम्बन्धी विषयमा विस्तृत छलफल गर्दै, वडाभित्र रहेको बान्द्रेबिडी चौरलाई आकर्षक र सफा बनाउने योजना अघि सारिएको हो । बैठकले योजना कार्यान्वयनका लागि सात सदस्यीय समिति गठन गर्ने निर्णय गरेको छ ।

गठित निर्माण समितिको नेतृत्व अमिलाश गिरीले गरेका छन् । समितिका अन्य पदाधिकारीहरूमा सचिव सन्तोष गुरुङ, कोषाध्यक्षमा उषा भारती गिरी र सदस्यहरू हिमाल श्रेष्ठ, कमला प्रधान, पदम प्रसाद जैसी तथा बल बहादुर गुरुङ रहनुभएको छ ।

वडाध्यक्ष गिरीले समितिप्रति बधाई ज्ञापन गर्दै सामाजिक कार्यमा पारदर्शिता, उत्तरदायित्व र प्रभावकारिता सुनिश्चित गर्दै अगाडि बढ्ने अपेक्षा व्यक्त गर्नुभएको छ । उहाँका अनुसार सो योजनाबाट वडाको सांस्कृतिक पहिचान र सौन्दर्यमा थप योगदान पुग्नेछ ।

लाेक कल्याणकारी