पर्वत । कृषि उत्पादनलाई आधुनिकीकरण र व्यवसायिकरणतर्फ डोर्याउने लक्ष्यसहित पर्वतको विहादी गाउँपालिका हाइटेक टनेल खेती विस्तार अभियानमा जुटेको छ । गाउँपालिकाले ८० प्रतिशत अनुदानमा हाइटेक टनेल निर्माणका लागि सहकारी संस्था, कृषक समूह तथा व्यावसायिक कृषक फार्महरूबाट प्रस्ताव आह्वान गरेको छ ।
स्थानीय किसानलाई प्रविधिमैत्री खेतीतर्फ आकर्षित गर्ने उद्देश्यसहित गाउँपालिकाले चालू आर्थिक वर्ष २०८२र८३ मा हाइटेक टनेल निर्माण कार्यक्रम सञ्चालन गर्न दुई करोड पच्चीस लाख रुपैयाँ विनियोजन गरेको छ । गाउँपालिकाको कृषि शाखाका अनुसार यो कार्यक्रमले उत्पादनमा विविधता ल्याउने, मौसमी सब्जी खेतीलाई निरन्तरता दिने र युवालाई कृषिमा पुनःआकर्षित गर्ने अपेक्षा गरिएको छ । हामीले यस कार्यक्रममार्फत कृषकलाई प्रविधिको पहुँचमा ल्याउँदै दिगो आम्दानीको बाटो खोल्ने प्रयास गरेका हौँ,” गाउँपालिकाका प्रमुख प्रशासकीय अधिकृत थमन बहादुर रेश्मीले बताए । उनका अनुसार टनेल खेतीले परम्परागत प्रणालीभन्दा कम लागतमा बढी उत्पादन लिन सकिने भएकाले यसले गाउँपालिकाको कृषि क्षेत्रलाई नयाँ आयाम दिनेछ ।
विहादीका धेरै किसानले विगत केही वर्षयता साना–साना टनेल प्रयोग गरेर राम्रो उत्पादन गरेका छन् । तर प्रविधिको पहुँच, पूँजी र संरचनाको अभावले हाइटेक टनेल खेती विस्तार गर्न नसकेको स्थानीय किसानहरूको भनाइ छ । गाउँपालिकाले यही आवश्यकता महसुस गर्दै सहकारी, समूह र फार्महरूलाई सहभागी गराएर सामूहिक रूपमा आधुनिक टनेल निर्माण गर्ने तयारी गरेको गाउँपालिकाका अध्यक्ष परबीन गुरुङले जानकारी दिनुभयो ।
कार्यक्रम अन्तर्गत सहभागी हुन चाहने कृषक, समूह वा सहकारीले सूचना प्रकाशित मितिदेखि १५ दिनभित्र आवश्यक कागजातसहित प्रस्ताव पेस गर्नुपर्नेछ । गाउँपालिकाले विशेषगरी हाइटेक टनेल खेतीमा सक्रिय कृषक समूहहरूलाई प्राथमिकता दिने जनाएको छ ।
?उश्रयो कार्यक्रम सफल भएमा विहादी गाउँपालिकालाई “हाइटेक कृषि क्षेत्र” को रूपमा चिनाउने सम्भावना देखिएको छ । स्थानीय उत्पादनले बजारमा प्रतिस्पर्धा गर्नसक्ने अवस्था सिर्जना गर्ने र गाउँमै रोजगारीका अवसर बढाउने अपेक्षा गरिएको छ ।
