पर्वत । गण्डकी प्रदेश सरकारले जेन–जी आन्दोलनको क्रममा क्षति भएका भौतिक संरचना पुनर्निर्माण गर्न चालु आर्थिक वर्षका लागि विनियोजित बजेटबाट करिब साढे २ अर्ब रुपैयाँ बजेट कटौती गर्ने तयारी गरेको छ ।

गत कात्तिक ११ मा बसेको मन्त्रिपरिषद् बैठकले पर्यटन बिदा, सवारी खरिद, भ्रमणसहित चालु शीर्षक विनियोजित बजेट आंशिक तथा पूर्ण कटौती गर्ने निर्णय गरेको थियो । त्यसैअनुसार सफ्टवेयर खरिद खर्च ८० प्रतिशत, अनुगमन–मूल्यांकन, भ्रमण र पत्रपत्रिका खर्च ५०–५० प्रतिशत, मसलन्द र विविध २५–२५ प्रतिशत, इन्धन र सवारी मर्मत खर्च २०–२० प्रतिशत कटौती गरिने आर्थिक मामिला मन्त्री डा। टकराज गुरुङले बताए ।

क्षति नभएका मन्त्रालयमा रहेको सार्वजनिक सम्पत्ति मर्मत शीर्षकको ५०–५० प्रतिशत बजेट कटौती गर्ने सरकारको योजना छ । जेनजी आन्दोलनको क्रममा गण्डकीको भौतिक, स्वास्थ्य र कृषि मन्त्रालयमा भौतिक क्षति भएको छैन । जलेर क्षति भएकालाई उपलब्ध गराउनबाहेक अन्यको हकमा नयाँ सवारी खरिद नगरिने उनले बताए ।

स्वास्थ्यबाहेक अन्य मन्त्रालयले कुनै नयाँ मेसिनरी सामग्री खरिद नगर्ने र क्षति भएकाबाहेक अन्य मन्त्रालय–कार्यालयले फर्निचर पनि नकिन्ने उनले सुनाए । यसरी चालु खर्च कटौती गर्दा २ अर्ब रुपैयाँ बचत हुने सरकारको अनुमान छ । ‘आन्दोलनको क्रममा प्रदेश सरकारलाई २ अर्ब जति क्षति भएको छ । चालु खर्च कटौती गर्दा त्यति नै बचत हुन्छ भन्ने अनुमान छ,’ मन्त्री गुरुङले सुनाए, ‘सकारात्मक पाटो हामीले जनतासँग जोडिने विकाससम्बन्धी कुनै बजेट काट्ने छैनौं ।’ साभार कान्तिपुर दैनिकवाट

लाेक कल्याणकारी