शिशिर उजाड,पोखरा ।पोखरामा नेपाल विद्युत प्राधिकरणले चालु अवस्थामा रहेका ट्रान्सफर्मरमा जडान गरेको तामाका तार चोरी गर्ने समुह सक्रिय भएको छ।पटक पटक त्यस्तो समुहले पोखरा–१८,ग्यारजाती र पोखरा–२२, पुम्दीभुम्दीका ट्रान्सफर्मरमा जडान गरिएको तामाको तार नै चोरी गरेको नेपाल विद्युत प्राधिकरण पोखरा वितरण केन्द्रले जनाएको छ। सो स्थान सहित पोखरा–१८ कै सुन्दर चौतारा,पदेंली, पोखरा–२१ को पोख्रेल थोक र अन्नपुर्ण गाउँपालिकाको अधिकारी डाँडामा पनि चालु अवस्थाका ट्रान्सफर्मरमा जडान गरिएका तामाको तार चोरी भएका हुन्।

तार चोरी भएपछि त्यस स्थानबाट विद्युत सेवा प्राप्त गर्ने विभिन्न ठाउँका उपभोक्ताहरु केही समय सो सेवाबाट वन्चित भएका थिए। निरन्तर रुपमा तार चोरी गर्ने क्रम बढेपछि प्राधिकरणले सुचना नै निकालेर विद्युत सेवा उपलब्ध गराउने स्थानका ट्रान्सफर्मर क्षेत्र वरपर अपरिचित व्यक्ति देखिएमा वा भेटिएमा जानकारी गराउन अनुरोध समेत गरेको छ।

निरन्तर रुपमा तार चोरी गर्ने कार्य ग्रामीण भेगमा बढी देखिएको प्राधिकरण पोखरा वितरण केन्द्रका ग्रामीण शाखा ईन्चार्ज शोभाकर पौडेलले बताए। सेवा नै अवरुद्ध पार्ने गरी भएका कार्यप्रति प्राधिकरणले गत असोजमा जिल्ला प्रहरी कार्यालय कास्कीको समेत ध्यानाकर्षण गराएको छ। उसले चोरी गर्ने कार्य बढेको भन्दै, ट्रान्सफर्मर जडान गरिएको क्षेत्रमा सुरक्षा माग गरेको छ। प्राधिकरणले चोरी कार्यमा सक्रिय समुहको पहिचान गरी कारबाही गर्न पनि माग गरेको हो।असहज परिस्थितिमा पनि प्राधिकरण सबै जनतालाई निरन्तर विद्युत सेवा उपलब्ध गराउन रात दिन तत्पर रहि कार्य गरिरहेको ईन्चार्ज पौडेलले बताए ।

सिमित श्रोत, साधन र भौगोलिक कठिनाईका बाबजुद पनि उपभोक्तालाई सहज सेवा उपलब्ध गराएको प्राधिकरणले जनाएको छ । यस्ता कार्यले उपभोक्तालाई भरपर्दो र सहज सेवा दिन कठिनाई भएको बताईएको छ । प्राधिकरणले त्यस्ता व्यक्ति वा समुहको पहिचान भएमा वा ट्रान्सफर्मर वरपर शंकास्पद व्यक्ति वा समुह देखिएमा प्रहरी प्रशासन अथवा नोलाईट नम्बर ०६१ ५७००३० र ०६१५७००३१ मा जानकारी गराई सहयोग गर्न सम्पूर्ण ग्राहकहरूमा आग्रह समेत गरेको छ।

हाल नेपाल विद्युत प्राधिकरण, पोखरा वितरण केन्द्रबाट पोखराका वडा नंं. १ देखि २५ र ३३ का केही भाग सहित अन्नपुर्ण गाउँपालिका, माछापुच्छ्रे गाउँपालिका र मादी गाउँपालिकाका ६ र ७ नम्वर वडामा गरी एक लाख भन्दा बढि ग्राहकहरूलाई विद्युत सेवा उपलब्ध गराएको जनाईएको छ।

लाेक कल्याणकारी