काठमाडौँ । अख्तियार दुरूपयोग अनुसन्धान आयोगसहित विभिन्न सरकारी निकायमा पदाधिकारीहरूको राजीनामा माग गर्दै धम्की दिएका जेनजीका प्रतिनिधि अर्जुनबहादुर शाही पक्राउ परेका छन्।

बुधबार जिल्ला प्रहरी परिसर काठमाडौंको टोलीले उनलाई पक्राउ गरेको हो।

शाहीका यसअघिका विभिन्न कसुरका मुद्दा बाँकी नै रहेकाले पक्राउ गरिएको परिसरका एसपी पवन भट्टराईले बताए।

‘उहाँका चार/पाँच वटा मुद्दा देखिएका छन्। केहीमा फरार र केहीमा जिम्मा जमानी भनिएको छ। हामी हेर्दैछौं। अतिरिक्त मुद्दाहरू पनि हुन सक्छन्। पछिल्लो समय उहाँले गरेका गतिविधिका आधारमा थप उजुरी पनि आउन सक्छन्,’ उनले भने।

प्रहरीले उनलाई कोटेश्वरबाट पक्राउ गरेको हो। जिल्ला प्रहरी परिसर, काठमाडौंले उनलाई पक्राउ गरेको हो ।

उपत्यका प्रहरी प्रमुख दानबहादुर कार्कीका अनुसार, उनको गतिविधिलाई लिएर गुनासो आएपछि प्रहरीले सोधपुछ र अनुसन्धानका लागि नियन्त्रणमा लिइएको हो ।

जेन-जी आन्दोलनपछि ज्ञापनपत्र बुझाउने भन्दै विभिन्न सरकारी कार्यालयका प्रमुखलाई भेटेर उनले केरकार गर्ने गरेका थिए । उनी प्रधानमन्त्री सपथमा पनि देखिएका थिए भने भारतीय मिडियासँग जेनजी नेताकै रूपमा अन्तर्वार्ता दिएका थिए ।

नागरिक उड्डयान प्राधिकरण, नेपाल वायुसेवा निगमका कर्मचारीहरुले समेत उनीको गतिविधिबारे गुनासो गरेका थिए । कर्मचारीहरुका राजीनामा माग्दै हिँड्ने गरेका उनीबारे खोजी हुँदा वैदेशिक ठगी र बैंकिङ कसुरका आरोपीसमेत रहेको खुलेको थियो ।

उनलाई २८ वैशाख २०८२ मा उपत्यका अपराध अनुसन्धान कार्यालयले समेत वैदेशिक रोजगारीसम्बन्धी कसुरमा पक्राउ गरेको थियो । उनी इलाम २ मा भएको उपचुनावमा समेत उम्मेदवार बसेका थिए । स्वतन्त्र उम्मेदवारी दिएर उनले ५५ मत ल्याएका थिए ।

लाेक कल्याणकारी