काठमाडौं । जेनजी आन्दोलनका घाइतेहरूले आन्दोलनलाई हाइज्याक गर्न खोजिएको भन्दै प्रधानमन्त्री र गृहमन्त्रीको ध्यानाकर्षण गराएका छन् ।

गत भदौ २३ र २४ गतेको आन्दोलनको क्रममा घाइते भएकाहरूले आइतबार सिंहदरबारमा प्रधानमन्त्री शुशीला कार्की र गृहमन्त्री ओमप्रकाश अर्याललाई भेट्दै आन्दोलनलाई हाइज्याक गर्न खोजिएको भन्दै ध्यानाकर्षण गराएका हुन् ।

सुरूमा छिर्न नपाएका उनीहरू दक्षिण गेटअगाडि धर्ना बसेका थिए । आलो घाउ लिएर पुगेका युवाहरूको हातमा अस्पतालको रिपोर्ट देखिन्थ्यो । केही बैशाखीको सहारामा पुगेका थिए ।

घाइतेहरू हामी नेपालका संयोजक सुदन गुरुङको नाम लिँदै आक्रोशित बनेका छन् । उनीहरूले सुदनलाई यो प्रदर्शनको लिडर भन्दै नहिँड्न समेत चेतावनी दिएका छन् ।

जेनजी प्रदर्शनमा कोही पनि लिडर नभएको र आफूहरूको माग सम्बोधन हुनुपर्ने भन्दै आक्रोश व्यक्त गरिरहेका छन् ।

दिनभर सिंहदरबारको मुख्यद्वार बाहिर बसेर प्रधानमन्त्री सुशीला कार्कीसँग भेट गरेका जेनजी आन्दोलनका घाइतेहरूले प्रधानमन्त्री कार्यालयबाहिरै अवसरवादी मुर्दावादको नाराबाजी गरेका छरे । आफूहरू जेनजी आन्दोलनको घाइते भए पनि सुदन गुरुङलगायत १० जना अवसरवादी र नक्कली आन्दोलनकारी सरकार गठनमा हाबी भएको आरोप उनीहरूले लगाएका छन् ।

आफूले खुट्टामा गोली खाएको देखाउँदै प्रधानमन्त्री कार्यालयबाहिर मिडियासँग बोलेकी एक आन्दोलनकारी युवतीले मृतक र घाइतेका परिवारलाई बेवास्ता गरेर अवसरवादीले सरकार गठन गरेको बताइन् । उनले जेनजीको नाम खराब गर्ने काम सुदन गुरुङले गरेको आरोप लगाइन् ।

आन्दोलनका घाइतेहरूले आन्दोलनका शहीद र घाइतेहरुको अपमान हुने किसिमका गतिविधिहरु सह्य नहुने चेतावनी पनि दिए ।

जेनजीका विभिन्न समूहरुले वर्तमान परिस्थितिमा सरकार समक्ष आ–आफ्नै माग राखिरहेका छन् ।

जसमा राजनीतिक दलमा आवद्ध युवाहरूले समेत जेनजी आन्दोलनको लाभ उठाउन लागेको भन्दै अर्को समूह आक्रोशित भएको छ । वास्तविक जेनजी पुस्ता आफूहरू रहेको भन्दै आन्दोलनबाट प्राप्त उपलब्धिमा रजाइँ गर्न नपाइने उनीहरुको चेतावनी छ ।

लाेक कल्याणकारी