पर्वत, । पर्वतको पत्रकारिता क्षेत्रको विगत, वर्तमान र भावी चुनौतीबारे गहिरो छलफल गर्दै पर्वत मिडिया समिट २०२५ भव्यताका साथ सम्पन्न भएको छ। समिटमा पत्रकारिता, सूचना प्रवाह र अभिव्यक्तिको स्वतन्त्रतासम्बन्धी विषयमा कार्यपत्र प्रस्तुत गरी बहस गरिएको थियो।

संचार तथा सूचना प्रविधि मन्त्रालयको सहयोगमा समाज कल्याण श्रोत विकास केन्द्र सोडेक नेपाल पर्वतको आयोजनामा तथा नेपाल पत्रकार महासंघ पर्वत शाखाको समन्वयमा कार्यक्रम सम्पन्न भएको हो।

कार्यक्रममा गण्डकी प्रदेश सभा सदस्य सांसद भक्त कुँवर, जिल्ला समन्वय समिति पर्वतका प्रमुख विष्णुराम विक, नेकपा एमाले नेता तथा पूर्वनगरप्रमुख पदमपाणी शर्मा, पत्रकार महासंघका केन्द्रीय सदस्य छविलाल तिवारी, सहायक प्रमुख जिल्ला अधिकारी गणेश पौडेल, पत्रकार महासंघ अध्यक्ष लक्ष्मण सापकोटा लगायतले आ–आफ्ना धारणा राख्दै पत्रकारिताको भूमिकामाथि प्रकाश पारे।

सांसद कुँवरले “प्रविधिको विकाससँगै पत्रकारिताको दिशा बदलिनुपर्छ” भन्दै तीनै तहका सरकारले सञ्चार क्षेत्रको सवलिकरणमा ध्यान दिनुपर्नेमा जोड दिनुभयो।
प्रमुख विकले सञ्चारले आवाजविहीनहरूको आवाज उठाउनुपर्ने बताउँदै बेथिति र कुशासनविरुद्ध कलम चलाउन पत्रकारलाई आग्रह गर्नुभयो।
शर्माले “सञ्चारबिना परिवर्तन सम्भव छैन” भन्दै सरकारहरू पत्रकारमैत्री बन्नुपर्ने धारणा राख्नुभयो।
तिवारीले मोफसलको पत्रकारिता टिकाउन चुनौती रहेको बताउँदै विज्ञापन वितरण प्रणालीलाई फराकिलो बनाउनु पर्नेमा जोड दिनुभयो।

समिटमा प्रमुख जिल्ला अधिकारी गणेश पौडेलले सूचनाको हक विषयमा कार्यपत्र प्रस्तुत गर्नुभयो भने अध्यक्ष सापकोटाले पर्वतको पत्रकारिताको विकास, अवस्था र चुनौती माथि कार्यपत्र प्रस्तुत गर्नुभयो।

कार्यक्रम सोडेक नेपालका अध्यक्ष देविप्रसाद तिमिल्सिनाको अध्यक्षतामा, पत्रकार महासंघ पर्वतका अध्यक्ष लक्ष्मण सापकोटाको स्वागत मन्तव्य तथा बलिनारायण रेग्मीको सञ्चालनमा सम्पन्न भयो।

कार्यक्रममा जिल्लाका विभिन्न सरकारी कार्यालय प्रमुख, सूचना अधिकारी, पत्रकार संगठनका प्रतिनिधिहरूको उल्लेख्य उपस्थिति रहेको थियो।

सो अवसरमा शिक्षा विकास समन्वय इकाई पर्वतले प्रकाशित गरेको “शैक्षिक सूचना” पुस्तकको लोकार्पण सांसद भक्त कुँवरले गर्नुभयो। पुस्तकमा पर्वत जिल्लाको सम्पूर्ण शैक्षिक अवस्थाको विवरण समेटिएको छ।

लाेक कल्याणकारी