पर्वत। पर्वतको कुश्मामा ३ दिने उद्घोषण तथा भाषणकला तालिम सम्पन्न भएको छ । दलित संजाल कुश्माको आयोजना तथा कुश्मा नगरपालिकाको सहयोगमा यहीँ १६ गतेदेखि संचालित उक्त तालिम बुधबार सम्पन्न भएको हो । तालिम समापन कार्यक्रममा बोल्दै प्रमुख अतिथि कुश्मा नगरपालिकाका नगरप्रमुख रामचन्द्र जोशीले दलित समुदायको सशक्तीकरणमा तालिमले महत्त्वपूर्ण फाइदा पुर्‍याएको बताउनुभयो ।

जुनसुकै कार्यमा टाठाबाठले नै बढी अवसर पाएको बताउदै दलितहरु सबल र सक्षम भएर आफ्नो हक अधिकार सुनिश्चितमा जोड दिनुपर्ने बताउनुभयो । आफुले छुवाछूत तथा विभेद कहिल्यै नगरेको बताउदै अहिलेको समयमा पनि कोही व्यक्तिले छुवाछूत गर्छ, भने उसमा मानवीय गुण नभएको जोशीले जिकिर गर्नुभयो । व्यक्ति दलितहरूको नेतृत्व, व्यक्तित्व तथा क्षमता विकासका लागि नगरपालिकाले कार्यक्रम बनाएर बजेट विनियोजन गर्ने नगरप्रमुख जोशीले प्रतिबद्धता व्यक्त गर्नुभयो ।

कार्यक्रममा बोल्दै कुश्मा नगरपालिका वडा नं. ६ का वडा अध्यक्ष तथा सामाजिक विकास समितिका संयोजक ईश्वर गिरीले बोल्ने कला महत्त्वपूर्ण कला भएको बताउदै बोल्न सक्ने मान्छे जुनसुकै क्षेत्रमा अब्बल र सफल हुने बताउनुभयो ।दलित समुदायको उत्थानका लागि नगरपालिकाले विभिन्न कार्यक्रमहरु संचालन गरेको र आगामी दिनहरूमा पनि त्यस्ता कार्यक्रमलाई निरन्तरता दिने उहाँले बताउनुभयो । कार्यक्रममा कार्यपालिका सदस्य लखन सुनार, प्रशिक्षक दिपेश बि. पोख्रेल, सहभागीको तर्फबाट कृष्ण बहादुर नेपाली र सीता परियार लगायतले मन्तव्य व्यक्त गर्नुभएको थियोे ।

तालिममा कुश्मा नगरपालिकाभित्रका करिब ३५ जनाको सहभागिता रहेको थियोे । उक्त तालिमको सहजीकरण पत्रकार दिपेश बि.पोख्रेल र लक्ष्मण बिसिले गर्नुभएको थियोे । दलित संजालका अध्यक्ष जित बहादुर विश्वकर्माको अध्यक्षतामा सम्पन्न कार्यक्रमको संचालन संजालका सचिव डम्बर बहादुर वि.कले गर्नुभएको थियो ।

लाेक कल्याणकारी