शिशिर,पोखरा । पोखराको मोहोरीया टोलमा रहेको विन्ध्येश्वरी आदर्श बोर्डिङ स्कुलमा निर्वाचन प्रक्रिया मार्फत विद्यार्थी प्रमुख तथा उप–प्रमुखको चयन भएको छ ।
विद्यालयमा हुने गतिविधिहरुलाई सहज रुपमा सम्पन्न गर्न र उनीहरूलाई निर्वाचन प्रक्रियाको बारेमा जानकारी गराउनको लागि मतदान प्रक्रियाबाट प्रमुख तथा उपप्रमुखको छनोट गरिएको हो । ६ जना विद्यार्थीहरुले प्रतिस्पर्धा गरेको सो निर्वाचनमा कक्षा १ देखि १० सम्मका विद्यार्थीहरुले मतदान गरी प्रमुख तथा उपप्रमुखको छनोट गरेका छन् । कार्यक्रमलाई सहयोग र सफल गराउन शिक्षक होमराज अधिकारीको अध्यक्षतामा पाँच सदस्यीय निर्वाचन समिति गठन गरिएको थियो ।
उक्त निर्वाचनबाट कक्षा १० मा अध्ययनरत छात्रा प्रशंशा कार्की प्रमुख र सोही कक्षामा अध्ययनरत छात्र सक्षम बाँस्तोला उप–प्रमुखमा अत्याधिक मत ल्याएर निर्वाचित भएका छन् ।खादा र ब्याज वितरण गर्दै विद्यालयका प्राचार्य कृष्ण कुमार श्रेष्ठले प्रमुख तथा उपप्रमुखलाई सपथ ग्रहण गराउनुभयो । उहाँले यस प्रकारको कार्यबाट विद्यार्थीले चुनावी प्रक्रियाका विषयमा ज्ञान हासिल गरेको बताउनुभयो।
नवनिर्वाचित प्रमुख र उपप्रमुखले विद्यालयमा हुने हरेक गतिविधिलाई सहजिकरण गर्ने प्रतिबद्धता जनाए।
