पोखरा । लायन्स क्लब इनटरनेशनल डिस्ट्रिक्ट ३२५ जे नेपाल अन्तरगत रिजन १२ मा रहेका पाँच वटा क्लबको संयुक्त पदस्थापन तथा सपथ ग्रहण कार्यक्रम सम्पन्न भएको छ । लायन्स क्लब अफ पोखरा लेखनाथ, लायन्स क्लब अफ पोखरा फेवा वेगनास चौतारी, लायन्स क्लब अफ पोखरा आरम्भ चौतारी, लायन्स क्लब अफ पोखरा उन्नति चौतारी र लायन्स क्लब अफ पोखरा भिजिटले संयुक्त पदस्थापन तथा सपथ ग्रहण कार्यक्रम आयोजना गरेका हुन् ।

गण्डकी प्रदेश सरकारका उर्जा, जलश्रोत तथा खानेपानी मन्त्री फणीन्द्र देवकोटाको प्रमुख आतिथ्यतामा पोखराको साइमन पार्टी प्यालेसमा आयोजित कार्यक्रममा महिला उद्यमी तथा समाजसेवी हेम कुमारी पुनलाई सम्मान अर्पण गरियो । समाजसेवा तथा महिला उद्यमीको क्षेत्रमा पु¥याएको योगदानको कदर गर्दै सम्मान गरिएको हो ।

कार्यक्रममा बोल्दै मन्त्री देवकोटाले लायन्स क्लब नेतृत्व विकास गर्ने संस्था रहेको बताए । कार्यकाल एकवर्षे हुने र नेतृत्व नदोहोरिने विशेषता भएको कारण यो गतिशील रहेको र सदस्यको स्तरवृद्धि गर्दै लैजाने विषयलाई राजनीतिक दलले समेत सिको गर्नुपर्ने बताए । राजनीतिमा सँधै एउटै व्यक्ति एउटै पदमा बसेर नेतृत्व विकासमा बाधक बन्ने गरेकोमा यसबाट शिक्षा दिलाउन लायन्सकर्मीले राजनीतिक नेतृत्वलाई झकझकाउने र खबरदारी गर्नु पर्नेमा जोड दिए ।

मन्त्री देवकोटाले लायन्सले सामाजिक कार्यमा गरेको योगदान तथा विपद्मा गरेको सहयोगको खुलेर प्रशंसा गरे । गण्डकी प्रदेश सरकारलाई मध्यावधिमा जान नदिनका लागि आफूले योगदान गर्दा मुद्दा खेपेर पदविहिन हुनुपरेको समेत गुनासो गरे । उपयुक्त कार्ययोजना लिएर आएको खण्डमा लायन्सले गर्ने कार्यक्रममा आवश्यकताको आधारमा सहयोग गर्ने वाचा समेत उनले गरे ।

लायन्स क्लब इनटरनेशनल डिस्ट्रिक्ट ३२५ जे नेपालका डिस्ट्रिक्ट गर्भनर तथा पदस्थापना अधिकृत मिलन थापाले वर्ष वर्ष २०२४–२०२५ का अध्यक्ष, पदाधिकारी र सदस्यको पदस्थापना गराइन् । पदस्थापना कार्यमा उनलाई सेकेन्ड भाइस डिस्ट्रिक्ट गर्भनर प्रजापति बाँस्तोलाले साथ दिए । डिस्ट्रिक्ट गर्भनर थापाले इन्टरनेसनल प्रेसिडेन्ट फ्याब्रीसियो एलिभेराको ‘मेक योर मार्क’ र आफूले अगाडि सारेको ‘खुशी बाँडौ’ थिमलाई ध्यान दिएर कार्यक्रम गर्नको लागि अनुरोध गरिन् ।

सो कार्यक्रममा वर्ष २०२३–२०२४ मा गरेका कामको प्रतिवेदन टिका बहादुर लम्साल, लिला तिमिल्सेना, ई.रविन सुवेदी र हिरामणि भुसालले प्रस्तुत गरे । वर्ष २०२४–२०२५ का अध्यक्ष ई. सागर भट्टराई, चित्र बहादुर गुरुङ, कृष्ण कुमारी कुँवर, अर्जुन भुजेल, हिरामणि भुसालले जिम्मेवारी प्राप्त गरे पश्चात गरेका काम तथा भावी योजना बारेमा अवगत गराए ।

कार्यक्रममा डिस्ट्रिक्ट एसिस्टेन्ट चिफ एडभाइजर सन्तोष घिमिरे, पढाउ अभियानका चिफ घनश्याम ढुंगाना, रिजन १२ का रिजन चियर पर्सन तथा कार्यक्रम संयोजक मोहनराज आचार्य, जोन चियर पर्सन महेश्वर रिमाल र चेत बहादुर कुमाल, सम्मानित महिला उद्यमी हेम कुमारी पुन, डिस्ट्रिक्ट को चिफ ओरेन्टेसन राजाराम पौडेल लगायतले बोलेका थिए ।
कार्यक्रमको आर्कषणको रुपमा सांस्कृतिक प्रस्तुती समेत रहेको थियो । सोही कार्यक्रम मार्फत आयोजक क्लबहरुले डिस्ट्रिक्ट तथा इन्टरनेशनलका कार्यक्रमका लागि सहयोग हस्तान्तरण समेत गरेका थिए ।