काठमाडौं। नेकपा (माओवादी केन्द्र) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ ले सरकारले नेपाल विद्युत प्राधिकरणका कार्यकारी निर्देशक कुलमान घिसिङमाथि अनावश्यक लान्छना लगाइरहेको बताएका छन् ।
आज (शुक्रबार) पार्टी स्थायी कमिटी बैठकमा प्रचण्डले विद्युत प्राधिकरणका कार्यकारी निर्देशकमाथि सरकार अस्वभाविक र अप्राकृतिक ढंगले प्रस्तुत भइरहेको ब्रिफिङ गरेको प्रवक्ता अग्निप्रसाद सापकोटाले बताए । प्रचण्डको भनाइ उद्धृत गर्दै उनले भने, ‘विद्युत प्राधिकरणका कार्यकारी अधिकृतमाथि अस्वभाविक ढंगले, अप्राकृतिक ढंगले लान्छना लगाउने कुरा भइरहेको छ ।’
त्यस्तै, प्रवक्ता सापकोटाका अनुसार प्रचण्डले आफू नेतृत्वको सरकारको पालामा सुरु भएको सुशासन र भ्रष्टाचार विरोधी अभियानलाई वर्तमान सरकारले अगाडि बढाउनुको साटो अवरोध सिर्जना गरेको बताए । ‘सरकारले त्यस्तो सुशासनको सवालमा, भ्रष्टाचार विरोधी अभियानमा अवरोध हुने खालका कुरा नगरोस् भनेर हामीले खबरदारी गरेका छौं,’– प्रवक्ता सापकोटाले भने ।
माओवादी केन्द्रको स्थायी कमिटीको अर्को बैठक भोलि बिहान ११ बजे पार्टी केन्द्रीय कार्यालय पेरिसडाँडामा बस्ने उनले जानकारी गराए ।
