काठमाडौं। नेपाल समाजवादी पार्टीका अध्यक्ष एवं प्रतिनिधि सभा सदस्य महिन्द्र राय यादवले नेपाली कांग्रेसकै कारण गठबन्धन टुटेर एमालेसहितको सरकार बनेको दाबी गरेका छन् । आज (बुधबार) प्रतिनिधि सभाको बैठकलाई सम्बोधन गर्दै उनले यस गठबन्धन सरकारले राष्ट्रियता, राष्ट्रिय एकता, जनजीविका, सुशासन, संविधान, लोकतान्त्रिक गणतन्त्रलगायतका मुद्दालाई संस्थागत गर्ने बताए ।

विगतमा कांग्रेस–माओवादी मिलेर बनेको सरकारको गोत्र नै नमिलेको उनको टिप्पणी छ । उनले अहिलेको सरकार गोत्र मिलेको र प्राकृतिक रहेको उनले जिकिर गरे ।

‘कांग्रेससँग यो गठबन्धनको गोत्रो पनि मिल्दैन । यो मिलेको पनि थिएन । त्यसकारणले यतासँग गोत्रो मिलेको छ । यो प्राकृतिक गोत्रमा बनेको छ । यसले मुलुकको हित गर्छ । देशको राष्ट्रियता, एकता, जनजीविका, सुशासन, संविधान, लोकतान्त्रिक गणतन्त्र र मधेशको मुद्दाका लागि यो गठबन्धनको आवश्यकता छ । यही गठबन्धन मुलुकको लागि हितकर हो,’– उनले भने ।

कांग्रेसले सामाजिक सद्भाव विगार्ने काम गरेको उनले बताए । संविधानको रक्षाका लागि अहिलेको गठबन्धन बनेको बताए । कांग्रेसले आफूलाई धोका दिएपनि माओवादीले कहिले पनि धोका नदिएको उनको भनाइ छ ।