पर्वत । सदरमुकाम कुश्मा बजारमा सञ्चालीत दुई वटा बहुमुखी क्याम्पसहरु एकिकरण (मर्ज)को लागि विभिन्न समितिहरुको गठन गरिएको छ । कुश्मामा सञ्चालीत गुप्तेश्वर बहुमुखी क्याम्पस र शिवालय बहुमुखी क्याम्पसलाई मर्ज गर्नका लागि एकिकरण सम्बन्धि विभिन्न समस्याहरु समाधानका लागि समितिहरुको गठन गरिएको हो ।आज एक कार्यक्रमका वीच ति समितिहरुको घोषणा सहितको जिम्मेवारी प्रदान गरिएको छ । दुई क्याम्पसका सञ्चालक समितिका पदाधिकारी, प्राध्यापकहरु तथा सञ्चालक सदस्यहरुको उपस्थितीमा ८ वटा उपसमितिहरुको गठन गरिएको छ । समितिहरुले दुई क्पाम्पस मर्जका लागि कानूनी प्रावधानहरुको संसोधन देखि क्याम्पस सञ्चालनको आगामी खाका समेत प्रस्तुत गर्नेछन् ।

क्याम्पसहरु एकिकरणका लागि भोलानाथ शर्माको संयोजकत्वमा विधान मस्यौदा उप समिति, कमलनाथ शर्माको संयोजकत्वमा इतिहास लेखन उप समिति, इन्द्रमान खत्रीको संयोजकत्वमा चन्दादाता संकलन उप समितिको गठन गरिएको छ । यसैगरी पृथ्वीनारायण शर्माको संयोजकत्वमा जनशक्ति आवश्यकता लेखाजोखा तथा नियुक्ती सिफारिस उप समिति तथा मिन प्रसाद श्रेष्ठको संयोजकत्वमा जिन्सी सम्पत्ति अभिलेख संकलन उप समितिको गठन गरिएको छ ।

यसैगरी एकिकरणको कामलाई प्रभावकारी बनाउनका लागि बिषम कुमार श्रेष्ठको संयोजकत्वमा आर्थिक अभियान सञ्चालन उप समिति, विष्णु नेवारको संयोजकत्वमा समुदाय सम्बन्ध परिचालन उप समिति र कमलनाथ पोख्रेलको संयोजकत्वमा आन्तरीक लेखा परिक्षण उप समितिको गठन गरिएको छ ।क्याम्पस एकिकरण गर्नका लागि विभिन्न निर्णयहरु लिनुपूर्व समितिहरुले विभिन्न ब्यक्तिहरुको समेत राय लिएर आफ्नो सुझाब क्याम्पसका ब्यवस्थापन समितिहरु समक्ष पेश गर्नेछन् । एकिकरण समितिका संयोजक गोविन्द पहाडीले ति समितिहरुको काम कर्तब्य र अधिकार सहित समितिका सदस्यहरुको नामावली सार्वजनिक गरेका छन् । समितिहरुले पेश गर्ने सुझाबका आधारमा क्याम्पसहरुको एकिकरण हुनेछ ।

समुदायको आफ्नो सम्पत्ति भएकाले सवै पक्षको सहयोग र सहकार्यमा क्याम्पसहरुको एकिकरण गरिने गुप्तेश्वर बहुमुखी क्याम्पसका अध्यक्ष बसन्त कुमार कमाचार्यले बताए । क्यापसहरुको एकिकरणमा सवै प्रकारका कानूनी प्रावधानहरु समाधान गरेर छिटो भन्दा छिटो एकिकरण गरिने शिवालय बहुमुखी क्याम्पसका अध्यक्ष हरिओम शर्मा लामिछाने बताउँछन् ।

दुवै क्याम्पसका सञ्चालक समितिहरुले क्याम्पसलाई एकिकरण गरी एक सवल, परिस्कृत, आधुनिक र एकिकृत क्याम्पस स्थापना गर्न आवश्यक रहेको महशुस गरी एकिकरण प्रकिया अगाडि बढाउन सहमत भएका छन् । उनिहरुले पव्लिक क्याम्पस संघ, पर्वतका अध्यक्ष गोविन्द पहाडीको संयोजकत्वमा दुवै क्याम्पसका अध्यक्षहरू बसन्तकुमार कर्माचार्य र हरीओम शर्मा लामिछाने तथा क्याम्पस प्रमुखहरु सुभाष पन्त र लेखनाथ उपाध्याय रहेको ५ सदस्यीय कार्यदल गठन गरेका छन् ।

कार्यदलले गत ६ महिना देखि शुरु गरेको अध्ययन र सहकार्यहरुवाट तयार भएको एकिकरण दस्तावेजको आधारमा दुवै क्याम्पसलाई एकिकरण प्रकृया टुंगोमा पु¥याउने भएको छ । वैठकले ५ सदस्यीय कार्यदलको विस्तार गरी १३ सदस्यीय अधिकार सम्पन कार्यदल गठन गरी ६ बुँदा रहेको कार्यादेश स्विकृत गरेको थियो भने गत माघ १६ गते भित्र दुवै क्याम्पसले आ–आफ्नो वार्षिक साधारण सभा सम्पन्न गरी एकिरणको प्रस्तावलाई अनुमोदन गरिसेका छन् ।

अहिले गुप्तेश्वर बहुमुखि क्याम्पसमा स्नातकोत्तर सहित २ सय ६२ र शिवालय बहुमुुखि क्याम्पसमा २६८ जना विद्यार्थी रहेका छन् । गुप्तेश्वर बहुमुखी क्याम्पस २०४८ सालदेखि सञ्चालनमा छ भने शिवालय बहुमुखी क्याम्पस २०६७ सालमा स्थापना भई सञ्चालनमा रहेको छ ।पर्वत जिल्लाभर १२ वटा क्याम्पस संचालनमा रहेका छन् । जिल्ला सवैजसो क्याम्पसहरुमा विद्यार्थीको संख्या न्यून छ । बिद्यार्थीको संख्या न्यून हुँदा ति क्याम्पसहरु बन्द हुने अवस्थामा पुगेका छन् ।

लाेक कल्याणकारी