पोखरा । लायन्स क्लब अफ पोखरा फेवा वेगनास चौतारीले न्यानो कपडा तथा शैक्षिक सामाग्री वितरण गरेको छ । क्लबले हेल्प नेपाल नेटवर्क सँगको सहकार्यमा शुक्ला गण्डकी नगरपालिका वडा नं ५ बेलचौतारा तनहुँमा विपन्न परिवारका बालबालिकालाई ४० सेट ट्रयाक सुट र शैक्षिक सामाग्री वितरण गरेको हो । प्रतिनिधि सभा सदस्य एवं पूर्व वनमन्त्री शंकर भण्डारीको प्रमुख आतिथ्यतामा मदर्सा नरुल स्कुलमा कार्यक्रमको आयोजना गरेर उनीहरुलाई सहयोग गरिएको थियो ।

कार्यक्रममा बोल्दै प्रतिनिधि सभा सदस्य भण्डारीले शिक्षा भन्दा ठुलो कुरा जीवनमा केही नरहेको बताए । तनहुँमा रहेका विद्यालयमा शैक्षिक गुणस्तर सुधार्न र सुविधा सम्पन्न बनाउन आफूले पहल गरिरहेको सुनाए । उनले बालबालिकालाई नियमित रुपमा विद्यालय पठाउन आग्रह गरे । अभिभावकलाई बालबालिकाले कसरी पढीरहेका छन् भनेर समेत ध्यान दिनुपर्नेमा जोड दिए । तनहुँमा विद्यार्थीलाई पाएक पर्ने ठाउँमानै विद्यालय रहेको समेत उनको भनाइ थियो । यस्ता सहयोगले विपन्न परिवारका विद्यार्थीलाई केही मात्रामा भएपनि सहज बनेको भन्दै कार्यक्रम निरन्तर आयोजना हुनुपर्ने बताए ।

लायन्स क्लब अफ पोखरा फेवा वेगनास चौतारीका अध्यक्ष टीकाबहादुर लम्सालको अध्यक्षतामा भएको कार्यक्रममा पूर्व सभासद हसिना बेगम, संविधान सभा सदस्य सफिक मिया, लायन्स क्लब अफ ३२५ जे नेपालका जिएटी कोर्डीनेटर सन्तोष घिमिरे, जिएटी को–कोर्डीनेटर टंक ढकाल, रिजन चियर पर्सन घनश्याम ढुंगान, जोन चियर पर्सन मोहनराज आचार्य, क्लबका सचिव हेमराज तिवारी लगायतले बोलेका थिए । क्लबले हेल्प नेपाल नेटवर्क सँगको सहकार्यमा ७० हजार रूपैयाँ बराबरुको सामाग्री हस्तान्तरण गरेको अध्यक्ष लम्सालले खुलाए । फेवा वेगनास चौतारी सामाजिक कार्यक्रम सक्रिय बन्दै विभिन्न कार्यक्रम मार्फत परिचित क्लब हो ।

लाेक कल्याणकारी