रामप्रसाद पाैडेल,पोखरा । पोखराको लामाचौरमा रहेको सरस्वती विद्याश्रमका विद्यार्थीले त्यस क्षेत्रका सामुदायिक विद्यालय सहयोग गरेका छन्।हालै लामाचौर तीज महोत्सव र ऐतिहासिक बाटुलेचौर तीज मेलामा भएको विद्यालय स्तरीय लोक नृत्य प्रतियोगितामा सहभागी भई प्राप्त गरेको पुरस्कारबाट उनीहरूले १९ नम्वर वडाका ६ वटा विद्यालयलाई ६/६ थान कुर्सी हस्तान्तरण गरेको भुमेश्वर आधारभुत विद्यालयका अध्यक्ष रामप्रसाद पाैडेलले जानकारी दिनुभयो। सो सहयोग वडाध्यक्ष पुष्पेन्द्र पाण्डे र सरस्वती विद्याश्रमका प्राचार्य कृष्ण गुरुङले विद्यालयका प्रधानाध्यापकलाई हस्तान्तरण गरे।
वडाका जनप्रतिनिधि तथा विद्यालय व्यवस्थापन समिति सदस्य दुर्गादेवि बस्नेतकाे अध्यक्षतामा आयाेजित सहयाेग हस्तान्तरण कार्यक्रममा वडाध्यक्ष पुष्पेन्द्र पाण्डेले सरकारी विद्यालय प्रति विद्यार्थीले गरेको कार्य प्रशंसनीय रहेको बताउँदै, विद्याश्रमले विगतका वर्षदेखि नै सामाजिक सहयाेगकाे क्षेत्रमा उदाहरणीय कार्यहरु गर्दै आएकाे बताउनुभयो। प्राचार्य कृष्ण गुरुङले विभिन्न अतिरिक्त कार्यक्रम अन्तरगत स्थानीय तहका मेला, पर्व र दिवसमा भाग लिएर प्राप्त गरेकाे पुरस्कार विद्यार्थीको ईच्छा अनुरुप महानगर भित्रका विभिन्न शैक्षिक संस्थाहरुमा सहयाेग गर्दै आईरहेकाे र यसपटक पाेखरा १९ का आधारभूत विद्यालयलाई सहयाेग गरेको जानकारी दिनुभयो ।
सरस्वती विद्याश्रमले हालै सम्पन्न लामाचाैर तीज महाेत्सवकाे नृत्य प्रतियाेगितामा सान्त्वना र बाटुलेचाैर तीज मेलामा द्वितीय स्थान प्राप्त गरेका थिए ।
