मुस्ताङ । मुस्ताङको थासाङ गाउँपालिकाका कृषकहरुको बगैंचामा उत्पादन भएका स्याउहरु धमाधम टिप्न शुरु गरिएको छ । उच्च घनत्वमा उत्पादन हुने गाला, फुजि, किङरड, गोल्डेन लगायतका स्याउहरु धमाधम टिप्न सुरु गरिएको हो । नेपालीहरुको महान चाड दशै‌ / तिहार नजिकिएसँगै यतिबेला मुस्ताङमा स्याउ टिप्न, प्याकिङ र बजारसम्म लगेर बिक्रीवितरण गर्न थालिएको हो ।

यसपटक टिपेको स्याउ आगामी १६ गतेभित्र बजारमा बिक्रीका लागि लैजान मिल्ने भएपछि व्यापारीहरुले बगैंचामै आएर स्याउ टिप्न थालेका हुन् । करिब २ महिना अघिबाटै मुस्ताङ भित्रिएका व्यापारीहरु अब आफूहरुले किनेका स्याउहरु बजारमा लगेर बिक्री गर्न पाउने भएपछि खुसी भएका छन् ।

पछिल्लो समय मुस्ताङमा परम्परागत (रैथाने) स्याउ उत्पादनमा ह्रास आउदै गर्दा आधुनिक उच्च घनत्वमा भने स्याउ उत्पादन राम्रो हुन थालेको छ । मुस्ताङका सबै कृषकहरु उच्च घनत्वमा आधुनिक स्याउ खेतीतर्फ आकर्षित भएका छन् । अहिले उच्च घनत्वको सबै जातका स्याउलाई व्यापारीहरुले बारीमै २ सय ५० रुपैयाँ तिर्न थालेपछि कृषकहरु उत्साहित भएका हुन् ।

लाेक कल्याणकारी