पर्वत । युवाहरुको क्षमता र नेतृत्व विकसामा सक्रिय पर्वत जेसीजले आयोजना गरेको सेभेन ए साईड फुटबल प्रतियोगिताको तयारी अन्तिम चरणमा पुगेको छ ।कुश्मा बजारमा भोली भदौ ५ देखि ७ गतेसम्म राष्ट्रियस्तरको खुला सेभेन ए साइड फुटबल प्रतियोगिता आयोजना गरिएको हो ।

मंगलबार पर्वत जेसीजका संस्थापक अध्यक्ष दुर्गाप्रसाद श्रेष्ठबाट जेसीज कप शिल्डको अनावरण तथा जर्सि सार्वजनिक गरिएको छ ।
कुश्मा नगरपालिका–५ बडगाउँ चौरमा सञ्चालन हुने फुटबल प्रतियोगितामा देशभरबाट २६ फुटबल समूह सहभागी हुने पर्वत जेसीजका अध्यक्ष अच्युत पौडेलले बताउनुभयो । पर्वतमा सर्वाधिक पुरस्कार राशिको फुटबल पहिलो पटक आयोजना भएको अध्यक्ष पौडेलको दाबी छ । विजेता समूहले १ लाख १ हजार १ सय ११ रुपैयाँ तथा उपविजेताले ५१ हजार १ सय ११ रुपैयाँ पुरस्कार पाउने छ ।

कुश्मा बजार पर्यटनमा अघि भएको विषयमा सबैलाई जानकारी छ । बन्जी, जिपलाइन, अग्लो पुल, र्‍याफटिङ, गुफा लगायतका गन्तव्यमा यहाँ आइपुग्ने पर्यटकहरू पुग्नु भइसकेको छ ’, उहाँले भन्नुभयो, ‘विगतमा खेलले चिनाएको पर्वतको साखलाई फुटबल प्रतियोगिताले फेरि फर्काउनेमा आसा गर्न सकिन्छ ।’ उहाँका अनुसार देशैभरका समूह सहभागी हुने हुँदा फुटबलले पर्वतको पर्यटनमा टेवा पुर्‍याउने छ ।
शिल्ड अनावरण गर्दै संस्थापक अध्यक्ष श्रेष्ठले युवाहरुको क्षमता र नेतृत्व विकास सँगै पर्वतमा जेसीजले सामाजिक क्षेत्रमा गरेको योगदानको प्रसंसा समेत व्यक्त गर्नुभयो । फुटबल प्रतियोगिताले खेल क्षेत्रमा लाग्न रुचि भएका युवाहरुको क्षमता र दक्षताको विकास गर्ने उहाँको भनाई छ ।

कार्यक्रममा पर्वत जेसीज अध्यक्षीय क्लवका अध्यक्ष निर्मल विश्वकर्मा, नेपाल पत्रकार महासंघ पर्वतका अध्यक्ष लक्ष्मण सापकोटा लगायतले प्रतियोगिताको पुर्ण सफलताको शुभकामना दिनुभएको थियो ।

अध्यक्ष अच्युत पौडेलको अध्यक्षतामा सम्पन्न कार्यक्रममा स्वागत खेल संयोजक एन्जल कर्माचार्य, जेसिज आस्था पाठ मन्जु शर्मा र संचालन महासचिब प्रवेशराज पुरीले गर्नुभएको थियो ।

लाेक कल्याणकारी