पर्वत । नेपाली महिलाहरुको महान पर्व हरितालिका तीजको अवसरमा प्रेस चौतारी नेपाल पर्वतको आयोजनामा महिला सञ्चारकर्मी सम्मान तथा दर खाने कार्यक्रम सम्पन्न भएको छ । परम्परागत संस्कृतिको जगेर्ना गर्ने उद्धेश्यले आयोजित कार्यक्रमलाई सम्वोधन गर्दै प्रेस चौतारी नेपालका अध्यक्ष गणेश पाण्डेले पत्रकारिता क्षेत्रलाई व्यवस्थित र सुदृढिकरण गर्दै अघि बढ्नुपर्नेमा जोड दिनुभएको छ ।

मोफसलको पत्रकारितामा विभिन्न खालका चुनौतीहरु थपिदै गएको बताउँदै अध्यक्ष पाण्डेले बदलिदोँ परिस्थितिसँग जुध्नका लागि पत्रकारहरुको क्षमता विकासमा जोड दिनुभयो ।उहाँले पत्रकारिता पेशाप्रतिको आकर्षण घट्दै गईरहेको, एआईको प्रयोगका चुनौती लगायत कोडिभ संक्रमणपछिको आर्थिक मन्दिले आम सञ्चार माध्यमलाई पारेको असरप्रति चिन्ता व्यक्त गर्दै सवै पक्षहरु एकजुट र जिम्मेवार भएर यसको समाधानमा सक्रिय हुनुपर्ने बताउनुभयो ।

कार्यक्रममा प्रेस चौतारी नेपाल गण्डकी प्रदेश इन्चार्ज गणेश पौडेल, पर्वत इन्चार्ज सिर्जना पन्त, प्रेस चौतारी गण्डकी प्रदेशका अध्यक्ष इन्द्र पौडेल, नेपाल पत्रकार महासंघ पर्वतका अध्यक्ष लक्ष्मण सापकोटा, प्रेस युनियन पर्वतका सचिब सुमनजंग थापा, सञ्चारिका समुह पर्वतका अध्यक्ष रञ्जना खत्री लगायतले बोल्नुभएको थियो ।

सो अवरसरमा पर्वतमा लामो समयदेखि पत्रकारिता गर्दै आएका र भर्खरै यो पेशामा लागेका महिला पत्रकार तथा सञ्चारकर्मीहरुलाई सम्मान पत्र र दोसल्ला ओढाएर सम्मान गरिएको थियो । कार्यक्रममा नेकपा एमाले गण्डकी प्रदेश इचार्ज किरण गुरुङ, नेकपा एमालेका केन्द्रीय सदस्य तथा प्रतिनिधि सभा सदस्य पदम गिरी, जिल्ला अध्यक्ष गोविन्द पहाडी, प्रदेश कमिटि सदस्य विष्णुराम विक, फलेवास नगरपालिकाका संस्थापक नगरप्रमुख पदमपाणी शर्मा, फलेवास नगरपालिका उपप्रमुख शोभा क्षेत्री, मोदी गाउँपालिकाका उपाध्यक्ष बिमल लामिछाने लगायतको सहभागिता रहेको थियो ।

प्रेस चौतारी पर्वतका अध्यक्ष दिपेश वि पोख्रेलको अध्यक्षतामा सम्पन्न कार्यक्रममा स्वागत निवर्तमान अध्यक्ष कृष्ण अखेली र संचालन सचिब दुर्गा शर्मा पुजनाले गर्नुभएको थियो ।
सो अवसरमा तीजका गीतहरुमा नाचगान समेत गरिएको थियो ।

लाेक कल्याणकारी