पर्वत ।साउन महिनाको अन्तिम सोमबार पर्वतको कुश्मा नगरपालिका–४ मा अवस्थित सात तले गुप्तेश्वर गुफामा बिहानैदेखि श्रद्धालुहरूको ठूलो भीड लागेको छ। गुप्तेश्वर धार्मिक तथा पर्यटकीय विकास संस्थाका अध्यक्ष हरिनारायण उपाध्यायका अनुसार यस वर्षको साउनका तीन सोमबार मात्र पाँच हजारभन्दा बढी भक्तजनले गुफामा दर्शन गरेका छन्।

आजको अन्तिम सोमबार पनि बेलुकीसम्म करिब तीन हजारभन्दा बढी श्रद्धालुले दर्शन गर्ने अनुमान गरिएको छ। साउन महिनामा विशेषगरी महिलाहरूले व्रत बसेर शिवको पूजा गर्ने परम्परा रहिआएको छ। आजको दिनमा व्रत बसेका महिलाहरूले विधिपूर्वक व्रत समाप्त गर्नेछन्।

कुश्मा बजारबाट करिब १० मिनेटको दूरीमा रहेको गुप्तेश्वर गुफा दुई साना पहाडी टाकुराको खोँचमा अवस्थित छ। धार्मिक मान्यता अनुसार पार्वतीले भगवान् शिवलाई पतिका रूपमा पाउन यहीं व्रत बसेकी थिइन् भने महादेव–पार्वती विवाहपछि केही समय यही गुफामा गुप्त बास बसेको विश्वास गरिन्छ।

श्रीस्वास्थानी ब्रतकथा र शिवपुराणमा उल्लेख भएअनुसार प्राचीन कुशुमपुर (हालको कुश्मा) मा प्रशस्त फलफूल र कुश पाइन्थ्यो। यही कुशुमपुरबाट फलफूल र कुश टिपेर पार्वतीले कुश्मा नगरपालिका–१ स्थित पार्वती गुफामा समेत तपस्या गरेकी किंवदन्ती पाइन्छ।

लाेक कल्याणकारी