पर्वत । पर्वतको सदरमुकाम कुश्मास्थित शिवालय युवा विकास मञ्चले यस वर्षको दशैंको अवसरमा भव्य लाइभ कन्सर्ट आयोजना गर्ने भएको छ। स्थानीय संस्कृति, कला र मनोरञ्जनलाई प्रवर्द्धन गर्ने उद्देश्यले असोज ११ गते कन्सर्ट आयोजना गर्न लागिएको मञ्चका अध्यक्ष सविधान गिरीले जानकारी दिनुभयो।

“बान्द्रेवेणी चौर संरक्षण हाम्रो अभियान, प्रकृति, संस्कृति र भविष्यका लागि हाम्रो संकल्प” भन्ने नारासहित हुने कन्सर्टको जानकारी तथा पोस्टर सार्वजनिक कार्यक्रम शिव मन्दिर कुश्मामा सम्पन्न भएको हो।

कार्यक्रमका प्रमुख अतिथि कुश्मा नगरपालिका–६ का अध्यक्ष इश्वर गिरीले मञ्चको यो पहल अनुकरणीय रहेको उल्लेख गर्दै, यस्ता कार्यक्रमले युवालाई जागरुक बनाउने बताउनुभयो। उहाँले युवाको हरेक सकारात्मक अभियानमा साथ दिने प्रतिबद्धता पनि व्यक्त गर्नुभयो।

कन्सर्टमा स्थानीय तथा राष्ट्रियस्तरका ख्यातिप्राप्त ब्याण्ड ‘द एक्स’ र ‘रिडम म्युजिक ग्रुप’ सहित अन्य कलाकारहरूको प्रस्तुति रहनेछ। कार्यक्रममार्फत संकलित रकम सामाजिक तथा सामुदायिक विकासका विभिन्न क्षेत्रमा खर्च गरिने आयोजकले जनाएको छ।

दशैंको उत्सवलाई रमाइलो र अर्थपूर्ण बनाउन आयोजना गरिएको यस कन्सर्टमा युवादेखि बृद्धसम्मको उत्साहजनक सहभागिता रहने अपेक्षा गरिएको छ। साथै, मञ्चले समाज कल्याणको हेतुले आज विशेष धार्मिक कार्यक्रम पनि सम्पन्न गरेको छ।

लाेक कल्याणकारी