पर्वत । पतञ्जली योग समिति पर्वत, महिला पतञ्जलि योग समिति पर्वत, युवा नेपाल तथा कुश्मा नगरसमितिको संयुक्त आयोजनामा कुश्मामा १५ दिने सह योग शिक्षक प्रशिक्षण कार्यक्रम बिहिबारवाट सुरु भएको छ ।
कार्यक्रम पतञ्जलि योग समिति पर्वतका अध्यक्ष ओमकुमार श्रेष्ठको अध्यक्षता र कुश्मा नगरपालिकाका उपप्रमुख स्वस्थानी रिजालको प्रमुख आतिथ्यतामा सञ्चालन भएको थियो । कार्यक्रममा कुश्मा नगरपालिका वडा नं। ६ र ७ का वडाध्यक्षहरू क्रमश ईश्वर गिरी र परशुराम पुरी, सामाजिक विकास कार्यालय पर्वतका कार्यालय प्रमुख गोविन्द पौडेल, पर्वत अस्पतालका मेडिकल सुपरिटेन्डेन्ट हेमन्त बास्तोला, जिल्ला प्रहरी कार्यालय र शशस्त्र प्रहरी चण्डीका गणका प्रमुख तथा प्रतिनिधिहरु एवं विभिन्न विद्यालयका प्रधानाध्यापकहरू र संघसंस्थाका प्रतिनिधिहरूको समेत उपस्थिति रहेको थियो ।
१५ दिने योग प्रशिक्षण कार्यक्रमलाई युवा नेपाल समिति गण्डकी प्रदेशका प्रभारी एवं केन्द्रीय प्रशिक्षक जमुना थापाले सहजिकरण गर्नुहुनेछ ।
कार्यक्रममा महिला पतञ्जलि योग समिति पर्वतका अध्यक्ष इन्दीरा शर्माले स्वागत मन्तव्य राख्नुभएको थियो भने पतञ्जलि योग समिति पर्वतका महामन्त्री ढाकाराम सापकोटाले संचालन गर्नुभएको थियो । उक्त तालिमले योग शिक्षालाई समुदायमा अझै प्रभावकारी रूपमा फैलाउन सहयोग पुर्याउने आयोजक पक्षको विश्वास रहेको छ ।
