पर्वत। शिवालय युवा विकास मञ्च, कुश्मा–६ पर्वतले समाजमा धार्मिक चेतना, आध्यात्मिक उन्नति र सकारात्मक ऊर्जाको प्रसार गर्ने महान उद्देश्यसहित विशेष आध्यात्मिक कार्यक्रमको आयोजना गरेको छ। स्थानीय शिवालय मन्दिर परिसरमा आयोजना गरिएको यस दिव्य अनुष्ठान अन्तर्गत रुद्री पाठ, विशेष पूजा तथा हवन कार्यक्रम सम्पन्न गरिनेछ।

कार्यक्रमका संयोजक तथा मञ्चका उपाध्यक्ष दीपेन्द्र भण्डारीका अनुसार, साउन २३ गते बिहानैदेखि सुरु हुने उक्त धार्मिक अनुष्ठानमा शिव पुराणमा उल्लेख गरिएका विधिपूर्वक सम्पूर्ण देवगणको आवाहन गरी, ग्रहशान्ति, मानवीय कल्याण र समाजमा विद्यमान नकारात्मक शक्तिहरूको शमनार्थ रुद्री पाठ, पूजा तथा हवन गरिनेछ।

“समाज कल्याण, धर्म-संस्कृतिको संरक्षण र आध्यात्मिक शुद्धिको सन्देश दिनु यस कार्यक्रमको मूल उद्देश्य हो,” संयोजक भण्डारीले बताए। उनले थपे, “हामी युवा पुस्ताले धार्मिक र सांस्कृतिक कार्यको नेतृत्व लिँदा समाजमा सकारात्मक प्रभाव पर्नुका साथै सामाजिक एकता र मेलमिलाप पनि प्रगाढ हुन्छ भन्ने हाम्रो विश्वास छ।”

मञ्चका सम्पूर्ण युवाहरूले यस कार्यक्रमलाई पूर्ण आत्मसमर्पणको भावनासहित आयोजनामा जुटिरहेको जनाइएको छ। कार्यक्रममा स्थानीय सर्वसाधारण, धार्मिक श्रद्धालु तथा समाजसेवीहरूको सहभागिता अपेक्षित गरिएको छ।

शिवालय मन्दिरको पवित्र वातावरणमा हुने यस दिव्य अनुष्ठानले नगरबासीको जीवनमा शान्ति, समृद्धि र आध्यात्मिक प्रेरणा प्रदान गर्ने मञ्चको विश्वास छ।

लाेक कल्याणकारी