शिशिर उजाड,पोखरा । पोखराको सार्वजनिक यातायातमा पनि विद्युतीय बस सेवा सञ्चालनमा आएको छ । पछिल्लो समयमा विद्युतीय गाडीमा उपभोक्ताको आकर्षण बढेसँगै पोखरामा पनि यसको आकर्षण देखिन थालेको हो ।

पोखरा यातायात सेवा प्रा. लिको व्यवस्थापन र व्यवसायी अशोक गुरुङको शेयर लगानीमा विहीवार देखि सार्वजनिक यातायातमा सेवा शुरु गरिएको बताइएको छ। पोखराको लामाचौरमा एक कार्यक्रमका बीच विद्युतीय बस सेवा शुभारम्भ गरिएको हो । पोखरा १६ का वडाध्यक्ष अमृत शर्मा तिमिल्सिना र १९ का वडाध्यक्ष पुष्पेन्द्र पाण्डेले सयुक्त रुपमा बस सेवाको शुभारम्भ गरेका हुन । कार्यक्रममा बोल्दै वडाध्यक्ष तिमिल्सिनाले पर्यटकीय शहर पोखराको वातावरणलाई पर्यटन मैत्री बनाउन पनि यातायात व्यवसायीको भुमिका महत्वपुर्ण हुने बताउँदै, विद्युतीय बस सेवाले वातावरण मैत्री हुने बताए। अर्का वडाध्यक्ष पाण्डेले यातायात व्यवसायीको कार्यप्रति प्रशंसा गर्दै, थप विद्युतीय गाडी विस्तार गरी प्रदुषण गर्ने गाडी विस्थापित गर्न सुझाव दिए।

कार्यक्रममा नेपाल यातायात व्यवसायी राष्ट्रिय महासंघ गण्डकीका सचिव योगेन्द्र केसी , नव आदर्श सामुदायिक विकास समाजका अध्यक्ष दिनेश भण्डारी, सिप्रदी मोटर्सका प्रमुख मोहदत्त भट्टराईले वातावरण संरक्षणका लागि विद्युतीय बस उपर्युक्त हुने बताउँदै यसमा स्थानीय सरकारले पनि प्रोत्साहन गर्नुपर्नेमा जोड दिए । १ करोड २५ लाख मुल्यमा टाटा कम्पनीको ३२ सिट क्षमताको टाटा अल्ट्रा इभि गाडी खरिद गरिएको शेयर लगानीकर्ता अशोक गुरुङले बताए । २ सय१३ किलोवाटको ब्याट्री भएको उक्त बसले २ सय ५० किलोमिटरसम्म गुड्ने क्षमता राख्ने सिप्रदी ट्रेडिङ पोखराका प्रमुख मोहदत्त भट्टराईले बताए ।

पोखरा यातायात सेवा प्रा. लिका अध्यक्ष देउप्रसाद गुरुङले पोखरामा धुवाँ फाल्ने गाडीहरुलाई क्रमशः विस्थापित गर्दै विद्युतीय गाडी सञ्चालन गर्ने तयारी गरेको जानकारी दिए।अध्यक्ष गुरुङको अध्यक्षतामा भएको कार्यक्रम संस्थाका कम्पनी सचिव देवि प्रसाद कुँइकेलले सञ्चालन गरेका थिए ।

लाेक कल्याणकारी