फाईल तस्बीर
पर्वत। कुश्मा बजारमा लाखे नाच देखाउने क्रममा मंगलबार साँझ दुई समूहबीच झडप भएको छ। नागपञ्चमीका अवसरमा प्रत्येक वर्ष झैँ यस वर्ष पनि कुश्मा नगरपालिकामा लाखे नाच आयोजना गरिएको थियो।
कुश्मा नगरपालिका–५ स्थित लोकतान्त्रिक चोकमा लाखे नाच प्रस्तुत भइरहेका बेला तल्लो हटिया बडगाउँ र माथिल्लो हटिया पुरानो बजारका दुई समूहको जम्काभेट हुँदा स्थिति तनावपूर्ण बनेको थियो। लाखे नाचमा सहभागी माथिल्लो हटियाको “लाखे एकीकृत समाज जिरो किलोमिटर युनिटी” र तल्लो हटियाको “नेवा सांस्कृतिक समूह” आफ्ना परम्परागत भेषभूषा, बाजागाजा र नृत्यसहित सांगीतिक वातावरणमा सहभागी भइरहेका थिए।
तर भिड अत्यधिक उच्शृङ्खल बनेपछि दुई पक्षबीच वाकयुद्ध हुँदै हातपातसम्म स्थिति पुगेको थियो। झडपको क्रममा राजिव गुरुङ घाइते भएका छन्। उनको अहिले प्रदेश अस्पताल कुश्मामा उपचार भइरहेको जिल्ला प्रहरी कार्यालय पर्वतले जनाएको छ।
घटनापछि प्रहरी टोली घटनास्थलमा पुगेर दुबै समूहलाई आ–आफ्नो टोलमा फर्काएको थियो। अहिले दुबै समूहका नाच क्षेत्रमा सुरक्षाका लागि प्रहरी खटाइएको छ। जिल्ला प्रहरी कार्यालय पर्वतका सूचना अधिकारी प्रहरी निरीक्षक रामप्रसाद सापकोटाका अनुसार, स्थिति नियन्त्रणमा आएको छ र कुनै ठूलो अप्रिय घटना हुन नपाएको बातउनु भयाे ।
लाखे नाच नेवार समुदायको महत्वपूर्ण सांस्कृतिक परम्परा भए पनि यसपटकको घटनाले स्थानीय तहमा संयोजन र सुरक्षाको आवश्यकता झन् बढाएको देखिन्छ।
