कुश्मा, पर्वत । सामाजिक सेवामा निरन्तर अग्रसर पर्वत कुश्मा नारी समूहले साउनको दोस्रो सोमबारको अवसरमा सर्वेश्वर शिव मन्दिर, कुश्मा–६ मा भक्तजनहरूलाई फलफुल तथा प्रसाद वितरण गरेको छ।
धार्मिक स्थलमा पुग्ने भक्तजनको सेवा गर्नुका साथै समूहले भजन–कीर्तन प्रस्तुत गर्दै धार्मिक वातावरणमा थप भक्ति र उल्लास थपेको थियो। कार्यक्रममा सहभागी दिदीबहिनीहरू एउटै ड्रेस– रातो सारी र नीलो ब्लाउज–मा सजिएका थिए, जसले समूहको एकता र सहकार्यको सुन्दर झल्को दिएको थियो।
समूहकी अध्यक्ष अनिता सापकोटाले सामाजिक कार्यप्रतिको आत्मीयता व्यक्त गर्दै भन्नुभयो । “सामाजिक कार्य गर्ने भनेपछि मन फुरुङ्ग हुन्छ। जहाँ सेवा गर्न सकिन्छ, त्यहाँ पुग्ने हाम्रो उद्देश्य हो।”
यो समूहले यसअघि पनि स्वच्छता अभियान, महिला स्वास्थ्य सामग्री वितरण, जनचेतनामूलक कार्यक्रम, र्यालीहरू लगायत विविध सामाजिक कार्य गर्दै आएको छ। छोटो समयमै यसले समाजमा सकारात्मक छवि बनाउँदै स्थानीय समुदायमा नारी नेतृत्वको शक्तिशाली प्रभाव प्रस्तुत गर्दै आएको छ।
पर्वत कुश्मा नारी समूहले देखाएको यो सक्रियता र समर्पणले अन्य संस्थाहरूलाई पनि समाजसेवामा प्रेरणा दिने विश्वास गर्न सकिन्छ।
