सम्पादक, रन्जना खत्री,चितवन। पूर्वी चितवनको खैरहनी नगरपालिका–१० अन्तर्गत पर्ने कुमरोज गाउँमा शनिबार सम्पन्न चरा अवलोकन कार्यक्रममा उल्लेखनीय सफलता प्राप्त भएको छ। बर्ड एजुकेशन सोसाइटीको आयोजनामा सम्पन्न उक्त कार्यक्रममा ११ जना चराप्रेमी सहभागीले कुल ६१ प्रजातिका चराहरू अवलोकन गरेका हुन्।
अवलोकन गरिएका पंक्षिहरूमा वाटरकक, फिजेन्ट-टेल्ड ज्याकाना, ग्रेटर पेन्टेड स्नाईप र ऊली-नेक्ड स्टर्क जस्ता दुर्लभ र आकर्षक प्रजातिहरू पनि समावेश रहेका छन्। कार्यक्रमले कुमरोज क्षेत्रको धान खेत, सिमसार र जलस्रोतहरू चराहरूको वासस्थानका रूपमा कति महत्त्वपूर्ण छन् भन्ने तथ्य उजागर गरेको छ।
बर्ड एजुकेशन सोसाइटीका अध्यक्ष विजय गिरीका अनुसार, “चरा अवलोकन केवल मनोरञ्जनको विषय होइन, यो जैविक विविधताको दस्तावेजीकरण र संरक्षणका लागि आवश्यक अभ्यास हो। हाम्रा खेतबारी र सिमसार क्षेत्रमा यति धेरै प्रजातिका चराहरू भेटिनु गर्वको कुरा हो, जसले भविष्यमा चराको पर्यटन र अनुसन्धानका लागि सम्भावना देखाएको छ।”
संस्थाले स्थानीय बासिन्दा र विद्यार्थीहरूलाई लक्षित गर्दै नियमित अवलोकन तथा जनचेतना कार्यक्रमहरू सञ्चालन गरिरहेको छ। यसले स्थानीयस्तरमा चरासँग सम्बन्धित ज्ञान र संरक्षण चेतना बढाउन सहयोग पुर्याउँदै आएको बताइएको छ।
नेचर गाईड एसाेसिएसनका अध्यक्ष अनिल गरुङ्गले चराहरुकाे प्रजाति र बिशेषताकाे बारेमा सहभागिलाई जानकारी गराउनुभएकाे थियाे ।
बर्ड एजुकेशन सोसाइटीले अर्को शनिबारका लागि नयाँ चराअवलोकन कार्यक्रम तय गरेको छ। स्थानको बारेमा चाँडै जानकारी दिइने र नयाँ क्षेत्रको चरा अन्वेषणमा सहभागी हुन इच्छुकहरूलाई आमन्त्रण गरिने बर्ड एजुकेशन साेसाईटीका सचिव प्रकाश चापागाईले जानकारी दिनु भयाे ।
कार्यक्रममा बिजय गिरी अध्यक्ष ,प्रकाश चापागाई सचिव,शिरलाल परियार सदस्य,अनिल गुरुङ्ग अध्यक्ष (नेचर गाईड एसाेसिएसन) ,जनक परियार,राेजन सुवेदी,अनिल महत्वाे,ईश्वर कडेल,निरज चाैधरी,सिद्धार्थ तामाङ्ग,सन्तकुमार तामाङ्ग लगाएत ११ जनाकाे सहभागिता रहेकाे थियाे । उक्त कार्यक्रमकाे सम्पुर्ण ब्यवस्थापन बर्ड एजुकेशन साेसाईटीका सदस्य शिरलाल परियारले गर्नुभएकाे थियाे ।
