पर्वत ।भुमि बैंकको अवधारणालाई नेकपा एमालेका जनप्रतिनिधिहरुले अस्वीकार गरेपछि बिहादी गाउँपालिकाले सो अवधारणा विना नै आर्थिक वर्ष ०८२/०८३ का लागि नीति, कार्यक्रम तथा बजेट सर्वसम्मत रूपमा पारित गरेको छ।

गाउँपालिका अध्यक्ष परविन गुरुङले विगत तीन वर्षदेखि भुमि बैंकमार्फत बाँझो जमिनको उपयोग गरी रोजगारी सिर्जना गर्ने उद्देश्यसहित कार्यक्रम अघि सार्दै आउनुभएको थियो। तर, यसपटक पनि एमालेका जनप्रतिनिधिको असहमतिको कारण भुमि बैंक प्रस्ताव अघि बढ्न सकेन। अध्यक्ष गुरुङले राजनीतिक स्वार्थ र व्यक्तिगत अहंकारले दुरदर्शी योजना विफल भएको भन्दै सामाजिक सञ्जालमार्फत दुःख व्यक्त गर्नुभएको छ।

उहाँका अनुसार, अध्यक्षले भुमि बैंक अवधारणाका लागि ३० लाख बजेट प्रस्ताव गर्नुभएको थियो तर एमाले पक्षको बहुमतले त्यसलाई घटाएर विविध परामर्श शीर्षकमा १० लाखमा सीमित गरियो।

‘संविधानअनुसार असारभित्र नीति तथा बजेट पास गर्नुपर्छ, पालिकालाई अनिर्णयको बन्दी बनाउनु उपयुक्त हुँदैन,’ अध्यक्ष गुरुङले भन्नुभयो, ‘त्यही कानुनी बाध्यता र स्थानीय सरकारको जिम्मेवारी बोध गर्दै सहमति जनाइएको हो।’

अन्ततः, अध्यक्ष गुरुङले भुमि बैंक अवधारणाबाट पछि हटेपछि एमालेका जनप्रतिनिधिहरु बजेटमा सहमत भएका हुन्। बिहिबार गाउँपालिकाको नीति तथा कार्यक्रम अध्यक्ष गुरुङले तथा बजेट उपाध्यक्ष मिना शर्मा तिवारीले प्रस्तुत गर्नुभएको थियो।

गाउँपालिकाले आगामी आर्थिक वर्षका लागि कुल ४५ करोड ३२ लाख ८१ हजार ३३२ रुपैयाँ बजेट पारित गरेको छ। जसमध्ये चालु खर्चतर्फ ३३ करोड ८९ लाख १५ हजार ४२२ रुपैयाँ र पुँजीगत खर्चतर्फ ११ करोड ४३ लाख ६५ हजार ९१० रुपैयाँ रहेको छ।

गाउँपालिकाका प्रमुख प्रशासकीय अधिकृत हरिप्रसाद भुसालका अनुसार, असार महिनाभित्रै बजेट पारित गर्नु पर्ने कानुनी बाध्यताअनुसार नीति तथा कार्यक्रम पारित गरिएको हाे ।

लाेक कल्याणकारी