पर्वत। कुश्मा नगरपालिकाले झण्डै ९० करोडको बजेट ल्याएको छ । मंगलबार आयोजित नगर सभाको १२ औ अधिवेशनले ८९ करोड ९७ लाख ४० हजार रुपैयाँको बजेट सर्बसम्मत पारित गरेको हो । कुल बिनियोजित रकममध्ये नगरसभाद्धारा बाँडफाँड योग्य रकम ३९ करोड ३९ लाख मध्ये चालुतर्फ एकमुष्ठ १५ करोड २५ लाख र पुजिगततर्फ वडागत योजना तथा कार्यक्रमका लागि ९ करोड बिनियोजित गरिएको छ ।
नगरसभाले नगरपालिकाको पूर्वाधार निर्माणमा तीन करोड ८० लाख, सामाजिक विकासतर्फ दुई करोड ६९ लाख, आर्थिक विकासतर्फ ८५ लाख, सुशासन तथा विपतसमेत गरी एक करोड ४० लाख, संस्थागत तथा सेवा प्रवाहतर्फ ९० लाख, समपुरकमा दुई करोड र भुक्तानी दिन बाँकी योजनाका लागि तीन करोड ५० लाख रुपैयाँ बिनियोजन भएको छ । यसरी नगरसभाले चालुतर्फ ५९ दशमलब ७० र पुँजीगततर्फ ४० दशमलब ३० प्रतिशत बजेट बिनियोजन भएको छ ।
नगरसभाले कुश्मा नगरपालिका वडा नम्बर १२ स्थित प्राथमिक स्वास्थ्य केन्द्रलाई १० शैय्याको नगर अस्पतालका रुपमा घोषणा गरेको छ । नगर प्रमुख रामचन्द्र जोशीले त्यसक्षेत्रका नगरबासीलाई सहज स्वास्थ्य सेवा उपलब्ध गराउनका लागि नगर अस्पताल घोषणा गरिएको जानकारी दिनुभयो । नगरसभामा नगर प्रमुख रामचन्द्र जोशीले नीति तथा कार्यक्रम र उपप्रमुख स्वस्थानी रिजालले बजेट प्रस्तुत गर्नुभएको थियो ।
